Дар шаш моҳи соли равон 152 адад квотаи президентӣ барои хатмкунандагони муассисаҳои таҳсилоти миёнаи умумии Вилояти Мухтори Кӯҳистони Бадахшон ҷудо гардида, инчунин иловатан 40 квота барои ҷамоати деҳоти Язгуломи ноҳияи Ванҷ ва 10 квота ба ноҳияи Роштқалъа дода шуд, - гуфт дар нишасти хабарӣ Одинашо Мардов, сардори Раёсати маорифи вилоят.

Ба иттилои номбурда аз 2701 нафар хатмкунанда 2275 нафар аз қайди Маркази миллии тестӣ гузаштанд, ки ин дар маҷмуӯъ 82, 4 фоизро ташкил дода, нисбати соли гузашта 3, 3 фоиз зиёд мебошад.

Қайд гардид, ки дар нимсолаи аввали соли 2020 аз тарафи Донишгоҳи Осиёи Марказӣ муассисаи таҳсилоти умумии рақами 17-и деҳаи Спинзи ноҳияи Шуғнон бо арзиши харҷномавии 900 ҳазор сомонӣ сохта, мавриди истифода қарор гирифт.

Феълан сохтмони кўдакистон барои 100 нафар ҷой бо арзиши 2 миллиону 260 ҳазор сомонӣ дар шаҳри Хоруғ, муассисаи томактабӣ дар ноҳияи Ванҷ барои 200 нафар кўдак ба маблағи 8, 5 миллион сомонӣ, муассисаи таҳсилоти миёнаи умумии рақами 9 дар маркази ноҳияи Рўшон бо арзиши 16, 5 миллион сомонӣ ва сохтмонӣ бинои якуми муассисаи таҳсилоти миёнаи умумии рақами 8 бомаром идома дорад.

Дар вилоят 26 муассисаи томактабӣ бо фарогирии 2 100 кўдак фаъолият доранд. Инчунин, дар 283 маркази рушди барвақтии кўдак 6 455 кўдак фаро гирифта шудаанд. Фарогирии кўдакон аз синни 3 то 6-сола дар вилоят 41, 2 фоизро ташкил медиҳад, ки ин дар ҷумҳурӣ мавқеи дуюм баъди шаҳри Душанбе мебошад.

Ғарибшо Ғарибшоев, сардори Донишкадаи ҷумҳуриявии такмили ихтисос ва бозомўзии кормандони соҳаи маориф дар вилоят иброз дошт, ки дар ҳамкорӣ бо Хадамоти Оғохон оид ба маориф дар заминаи муассисаҳои таълимии иловатан 27 адад марказҳои рушди барвақтии кўдак таъсис дода мешаванд.

Ба гуфтаи Ҷонмамад Шермамадов, ректори Донишгоҳи давлатии Хоруғ соли ҷорӣ наздики 1000 нафар донишгоҳро хатм намуданд, ки аз инҳо 676 нафар дар шуъбаи рўзона ва 271 нафар дар шуъбаи ғоибона таҳсил мекарданд. Аз 296 нафар хатмкунандагони равияи омўзгорие, ки тариқи буҷавӣ таҳсил мекарданд, 96 нафар тибқи квотаи президентӣ ва 133 хатмкунандаи дигар мувофиқи дархост ба муассисаҳои таълимӣ фиристонида шуданд. Мутаассифона, ба сабаби набудани дархости иловагӣ 139 нафар хатмкардаи равияи омўзгорӣ бе тақсимот монданд.

Феълан барои соли 2020 нақшаи қабул 1623 нафарро ташкил медиҳад, ки аз ин 1141 нафар ба шуъбаи рўзона ва 389 нафар дар шуъбаи ғоибона рост меояд. Ба ибрози профессор Ҷонмамад Шермамадов ҳамасола ҷойҳои буҷавӣ 100 фоиз пур мешаванд ва проблемаи асосӣ дар қисми шартномавӣ аст. Бо дарназардошти он, ки имсол 4 654 нафар довталаб донишгоҳро интихоб карданд, вазъи қабули донишҷўён ба шуъбаҳои шартномавӣ ҳам нисбат ба солҳои дигар беҳтар хоҳад шуд. Дар донишгоҳ 54 нафар номзадҳои илм, 12 нафар докторҳои илм кор мекунанд.

Мутаассифона, фаъолияти шўроҳои диссертатсионӣ муваққатан то моҳҳои сентябр боздошта шудааст ва бо кушода шудани шўроҳои диссертатсионӣ устодони донишгоҳ рисолаи номзадиро барои ҳимоя пешниҳод хоҳанд кард. Аз ҳисоби грантҳо, ки тавассути ҳамкориҳои байналмилалии донишгоҳ ба даст омаданд, дар мавзеи Ҷелондеҳ сохтмони як гармхонаи замонавӣ барои гузаронидани таҷрибаҳои илмӣ идома дорад. Инчунин барои ихтисоси геология лабораторияи махсус, ба маблағи 100 ҳазор доллар ташкил гардида, бо ба эътидол омадани вазъ он мавриди баҳрабардорӣ қарор мегирад.

Сардори Шуъбаи фарҳанги вилоят Сайёд Қурбонмамадов дар нишаст иттилоъ дод, ки соли ҷорӣ дар театри мусиқӣ-мазҳакавии шаҳри Хоруғ ду асар– «Гурбаи музапўш» барои кўдакон ва асари «Вирод» ба саҳна гузошта шуданд. Дар ҳамкорӣ бо Раёсати маорифи вилоят фестивал-озмуни «Ҳафтаи китобу кўдакону наврасон» таҳти унвони «Тараннумгари сухан» бо фарогирии доираи васеи хонандагон дар шаҳру ноҳияҳои вилоят баргузор гардид. Чор нафар дар озмуни библиомарафон ғолиб дониста шуда, ба даври ҷумҳуриявӣ роҳхат гирифтанд.

Ҳоло сохтмони театри вилоятӣ дар шаҳри Хоруғ бомаром ҷараён дошта, қарор аст, ки ин муассисаи фарҳангӣ дар арафаи сафари навбатии Пешвои миллат муҳтарам Эмомалӣ Раҳмон ба шаҳру ноҳияҳои вилоят мавриди истифода қарор гирад.