Имрӯз дар Донишгоҳи давлатии тиббии Тоҷикистон (ДДТТ) ба номи Абуалӣ ибни Сино 68-умин конференсияи байналмилалии илмӣ-амалии донишгоҳи мазкур дар мавзӯи “Заминаҳои бунёдии рушди инноватсионии илм ва таълим” бахшида ба “Солҳои рушди деҳот, сайёҳӣ ва ҳунарҳои мардумӣ” баргузор гардид.

Дар конференсияи мазкур ректори ДДТТ ба номи Абуалӣ ибни Сино Гулзода Маҳмадшоҳ Қурбоналӣ, Президенти Академияи миллии илмҳои ҷумҳурӣ Фарҳод Раҳимӣ, муовини вазири маориф ва илм Диловар Баҳриддин, намояндаи Донишгоҳи тиббии Самарқанд, олимони ватаниву хориҷӣ ва ҳамзамон тариқи онлайнӣ (фосилавӣ) вазири тандурустӣ ва ҳифзи иҷтимоии аҳолии кишвар Абдуллозода Ҷамоллиддин Абдулло иштирок ва суханронӣ намуданд.

Гулзода Маҳмадшоҳ Қурбоналӣ, ректори ДДТТ ба номи Абуалӣ ибни Сино зимни ифтитоҳи конференсия иброз дошт, ки ДДТТ ба номи Абуалӣ ибни Сино дар баробари омода намудани мутахассисони соҳаи тандурустии кишвар, инчунин дар рушди илми тиб нақши калидӣ мебозад.

“Натиҷаҳои илмии олимон пайваста дар маҷаллаҳои илмии бонуфузи ватаниву хориҷӣ ва ҳамоишҳои илмӣ пешниҳод карда шуда, онҳо мавриди муҳокимаи ҷомеаи илмӣ қарор доранд. Маҳз ҳамоиши илмии имрӯза баҳри натиҷагирии фаъолияти илмии донишгоҳ, таҳлили амиқи илмии мушкилотҳо ва дар ин замина тарҳрезии тадқиқотҳои илмӣ мебошад”, - иброз намуд ректори ДДТТ.

Вазири тандурустӣ ва ҳифзи иҷтимоии аҳолии кишвар зимни баромади онлайнии худ ҳозиринро ба муносибати баргузории конференсия табрик намуда, қайд намуд, ки хуруҷи пандемияи КОВИД-19 боиси ташвиши мардуми сайёра гашта, бо мақсади пешгирии паҳншавии минбаъда ва дарёфти ваксинаи мувофиқи он дар машҳуртарин озмоишгоҳҳои марказҳои эпидемологии дунё тадқиқотҳои олимону мутахассисон идома дорад.
Ҳамзамон иброз дошт, ки дар конференсияи имрӯза 188 маърӯзаи олимони тоҷик ба самтҳои гуногуни пешгирӣ ва муолиҷаи ин бемории хавфнок бахшида шудааст. Дар марҳилаи аввали хуруҷи пандемияи КОВИД -19 як қатор устодони ДДТТ бо меҳнати содиқона ва матонату устувории хеш тавонистанд, дар паст намудани шиддати паҳншавии бемории номбурда саҳми арзандаи хешро гузоранд.

Инчунин Президенти Академияи миллии илмҳои ҷумҳурӣ Фарҳод Раҳимӣ зимни баромади хеш гуфт, муттаҳид кардани қувваҳои илмӣ барои кишвари мо як амри зарурист. Дар кишвар самтҳои афзалиятноки тадқиқоти илмӣ барои солҳои 2021-2025 аз тарафи Ҳукумати Ҷумҳурии Тоҷикистон қабул гардид.

Дар хотимаи конференсия тавофуқнома (Резолютсия) қабул карда шуд, ки он барои ворид намудани дастовардҳои олимони ҷаҳонӣ ва ватанӣ ба амалияи илми тиб, пешрафти соҳаи тандурустӣ ва солимгардонии ҷомеа мусоидат хоҳад кард.