Фарҳод Раҳимӣ, президенти Академияи илмҳои Тоҷикистон дар нишасти матбуотӣ зикр кард, ки дар шаш моҳи соли 2016 аз тарафи кормандони муассисаҳои илмии Академияи илмҳо 750 кори илмӣ, аз ҷумла 45 китобу монография, маҷмӯаҳои илмӣ, брошюра, 705 мақолаи илмӣ (640 мақола дар маҷаллаҳои илмии ҷумҳурӣ, 40 мақола дар маҷаллаҳои кишварҳои Иттиҳоди Давлатҳои Мустақил ва маҷаллаҳои давлатҳои хориҷи дур) ба табъ расонида шуда, 6 патент барои ихтироот ба даст оварда шуд.

Гуфта шуд, ки дар ин давра дар 19 шӯрои диссертатсионии Тоҷикистон 158 рисола, аз ҷумла 16 рисолаи докторӣ ва 142 рисолаи номзадӣ дифоъ карда шуд. Дар 5 шӯрои диссертатсионии академия ҳамагӣ 69 рисола докторӣ ва 63 рисолаи номзадӣ ҳимоя карда шуд. Аз шумораи дифоъкардагон 15 нафар шаҳрвандони хориҷӣ мебошанд. Аз ҷониби кормандони АИ ҶТ дар умум 40 рисола ҳимоя шудааст, ки аз он 8 рисолаи докторӣ ва 32 рисолаи номзадӣ мебошанд.  Ҳамзамон, муассисаҳои илмии АИ ҶТ аз рӯйи 96 мавзӯъ, 64 мавзӯи илмӣ-таҳқиқотии бунёдӣ ва 32 мавзӯи амалӣ таҳқиқот анҷом дода, дар бисёре аз самтҳои таҳқиқоти бунёдӣ ва амалӣ натиҷаҳои нав ба даст оварданд.