Имрӯз, 1 сентябри соли 2017, раиси Кумитаи кор бо ҷавонон ва варзиши назди Ҳукумати ҷумҳурӣ Аҳтам Абдуллозода бахшида ба Рӯзи дониш, Дарси сулҳ ва Соли нави хониш дар арафаи “Соли ҷавонон” бо устодону донишҷӯёни Донишкадаи тарбияи ҷисмонии Тоҷикистон ба номи Саидмуъмин Раҳимов мулоқот доир намуд.

Раиси Кумита дар аввали суханронии худ донишҷӯёнро ба Рӯзи дониш табрик намуда, аз онҳо даъват ба амал овард, ки дар роҳи донишазхудкунию донишандӯзӣ ҳарчи зиёд саъю талош намоянд. Аҳтам Абдуллозода дар рафти суханрониаш аз дастгирииҳои пайвастаи Пешвои миллат, муҳтарам Эмомалӣ Раҳмон ёдовар шуда иброз дошт: “Мо шоҳидем, ки дар кишвари мо Рӯзи дониш ва Дарси сулҳ ба таври хосса ҳамасола бо иштироки бевоситаи Пешвои муаззами миллат, муҳтарам Эмомалӣ Раҳмон таҷлил мегардад. Ҳамасола дар арафаи ин рӯз дар ҷумҳурӣ муассисаҳои таълимии нав сохта ба истифода дода мешаванд. Асосгузори сулҳу ваҳдати миллӣ - Пешвои миллат, муҳтарам Эмомалӣ Раҳмон чун анъана рӯзи 1-уми сентябр бо донишҷӯён ва аҳли зиёи кишвар вохӯриҳои судманд гузаронда, атрофи аҳамияти илму дониш ва нақши олимону донишмандони миллат дар пешрафту тараққиёти пайвастаи давлат суханрониҳо менамоянд. Чуноне соли ҷорӣ дар мулоқот бо донишҷӯёни Академияи Вазорати корҳои дохилӣ иброз доштанд, дар кишвари мо Рӯзи дониш баробари Дарси сулҳ арзиши баланд дошта, шогирдони муассисаҳои таълимӣ ва волидайну омӯзгорони онҳо ин санаи фархундаро бо шодиву ифтихор истиқбол менамоянд. Мафҳуми дониш барои халқи мо аз замонҳои қадим то имрӯз як ҷузъи муҳимтарини маънавиёт ба ҳисоб меравад. Бузургони гузаштаамон донишро чароғи ақл ва ҷавшани ҷисм донистаанд”.

Баъд аз анҷоми вохӯрӣ раиси Кумита ҳамроҳ бо устодону донишҷўёни Донишкада бо шарту шароит ва лавозимоти дарсӣ шинос шуд. Дар рафти ин шиносоӣ раиси Кумитаи кор бо ҷавонон ва варзиш ҳамчунин аз машғулиятҳои дифои ҳарбии донишҷӯён дидан намуда, зимни мулоқот бо донишҷӯён бо овардани мисолҳо аз корнамоиву хизмати намунавии аскарони қисмҳои низомии кишвар ҷавононро ба хизмати содиқона ба Ватан даъват намуданд. Аҳтам Абдуллозода зимни суҳбат афзуданд: “Сарбозоне, ки дар роҳи таъмини амнияти кишвар ва шаҳрвандон содиқона адои хизмат намуда, дар ҳолати зарурӣ ҷони худро нисор кардаанд, ифтихори миллату давлат ҳастанд. Кулли мардуми кишвар аз ин гуна ҷавонони ҷасуру ҷонфидои Ватану халқ фахр намуда, онҳоро ҳеҷ гоҳ фаромӯш намекунанд. Аз ин рӯ, ин гуна ҷавонон – сарбозони қисмҳои низомии кишвар бояд барои ҳар як ҷавон боиси ифтихору намунаи ибрат бошанд. Донишҷӯёни Донишкадаро зарур аст, ки илмҳои муосирро хуб азбар намуда, барои дифои сарзамин ва пешрафти он саҳми бештар гузоранд. Албатта, дастовардҳои имрӯзаи донишҷӯёни Донишкада дар сатҳи ҷумҳурӣ қобили таҳсин аст, вале шумо набояд бо ин қаноатманд нашавед”.

Донишҷӯён дар навбати хеш изҳори миннатдориро барои дастгириҳои пайвастаи Ҳукумати кишвар, Пешвои муаззами миллат, муҳтарам Эмомалӣ Раҳмон нисбат ба ҷавонуну донишҷӯён ва эълон доштани “Соли ҷавонон” иброз дошта ваъда доданд, ки “Соли ҷавонон” ва Соли нави таҳсилро бо дастовардҳои бештару назаррас ҷамъбаст хоҳанд кард.

Хуршед МАВЛОН, “ҶТ”