24 апрел дар Муассисаи давлатии “Маркази кӯдакон ва наврасони шаҳри Душанбе” нахустин олимпиадаи даставии хонандагони муассисаҳои таҳсилоти миёнаи умумии шаҳри Душанбе аз фанни технология (таълими меҳнат) ҷамъбаст гардид.                  

Ин олимпиада бо дастгирии Мақомоти иҷроияи ҳокимияти давлатии шаҳри Душанбе ташкил гардида, таҷрибаи нахустин на танҳо дар пойтахт, балки дар ҷумҳурӣ ва минтақа арзёбӣ мегардад.
Дар маросими ҳавасмандгардонӣ ба ғолибон ва иштирокчиёни фаъоли олимпиада ҷомҳои ғолиб, диплому сипоснома ва дигар туҳфаҳои таъсиснамудаи Мақомоти иҷроияи ҳокимияти давлатии шаҳри Душанбе тақдим карда шуд.

Дар олимпиада дастаи хонандагони ноҳияи Шоҳмансур сазовори ҷойи аввал, ноҳияҳои Сино ва Исмоили Сомонӣ сазовори ҷойи дуюм, ноҳияи Фирдавсӣ ва дастаи Литсей-интернати президентӣ барои кӯдакони болаёқат сазовори ҷойи сеюм гардиданд. Инчунин омӯзгорон ва хонандагоне, ки дар рафти олимпиада лоиҳаҳои беҳтарини эҷодиро пешниҳод намуданд, сазовори ифтихорномаҳо гардиданд.

Дар охир аз ҷониби таълимгирандагони Муассисаи давлатии “Маркази кўдакон ва наврасони шаҳри Душанбе”, барномаи фарҳангӣ пешкаши иштирокчиён гардонида шуд.