19 апрел дар Донишкадаи давлатии фарҳанг ва санъати Тоҷикистон ба номи Мирзо Турсунзода, бахшида ба баргузории озмуни “Илм-фурӯғи маърифат”, “110 – солагии Шоири халқии Тоҷикистон Мирзо Турсунзода” ва дар доираи ҳафтаи илм конфронси ҷумҳуриявии илмию назариявӣ баргузор гардид.

Дар конфронс Манучеҳр Шарифзода, муовини вазири фарҳанги Ҷумҳурии Тоҷикистон, Дилшод Раҳимӣ, директори Пажӯҳишгоҳи илмӣ-таҳқиқотии фарҳанг ва иттилооти Вазорати фарҳанг ва устодону донишҷӯёни донишкада иштирок намуданд.

Муҳриддин Низомӣ, ректори донишкада бо сухани ифтитоҳи чорабиниро оғоз карда, мавзӯи “Рушди фарҳанг ва санъати тоҷик дар замони истиқлолият”-ро матраҳ намуд. Номбурда қайд кард, ки сиёсати фарҳангпарваронаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, бо ҳимояи арзишҳои миллӣ, эҳёи суннатҳои гузаштагон, фароҳам овардани имконият барои омӯзиш ва тарғиби васеи онҳо, инчунин ба ҷаҳониён муаррифӣ намудани дастовардҳои фарҳанги равона шудааст.

Дар конфронс аз муҳиммияти баргузории озмуни “Илм-фурӯғи маърифат” сухан рафта, ҳадафи асосии ин иқдомро ташаккул додани ҷаҳонбинии илмии ҷомеа, рушди тафаккури техникӣ, пайванди илм бо истеҳсолот ва хусусан, ҷалб намудани ҷавонон ба ихтироъкорӣ ва навоварӣ мансуб донистанд.

Дар доираи конфронс пас аз анҷоми ҷаласаи ифтитоҳӣ, бахшида ба 110-солагии Шоири халқии Тоҷикистон, Қаҳрамони Тоҷикистон Мирзо Турсунзода барномаи консертӣ пешкаши ҳозирин гардонда шуд. Устодону донишҷӯён шеърҳои “Бӯи гул”, “Таронаи рӯд”, “Оби Душанбе”, “Ситораи ман”, “Хонаи мо” ва “Дили модар”-и устод Мирзо Турсунзодаро сароида, табъи иштирокдорони конференсияро шод намуданд.