Дар давраи таътили тобистона бо қарори раиси шаҳри Душанбе муҳтарам Рустами Эмомалӣ 10 ҳазору 352 нафар кӯдаку наврас ба истироҳати тобистона фаро гирифта мешаванд

Дар ин хусус гурӯҳи фейсбукии Сарраёсати маорифи шаҳри Душанбе хабар дод.

Ба иттилои манбаъ дар ин хусус қарори раиси шаҳри Душанбе аз 26 апрелтаҳти рақами №282 ба тасвиб расид.

Дар қарори мазкур омадааст: “Муовини Раиси шаҳри Душанбе, сарпарасти соҳа, раисони ноҳияҳои шаҳри Душанбе, шуъбаи рушди иҷтимоӣ ва робита бо ҷомеаи дастгоҳи Раиси шаҳри Душанбе ва Сарраёсати маорифи шаҳри Душанбе дар истироҳатгоҳҳои беруназшаҳрии “Зимчуруд”, “Гулхан”, “Шарора” ва “Орзу”, инчунин майдончаҳои истироҳатию солимгардонии назди муассисаҳои таълимӣ, ки дар онҳо ташкилу баргузории истироҳати тобистонаи кӯдакону наврасон пешбинӣ шудааст, то 25 майи соли 2024 корҳои ободонӣ, сохтмонӣ, таъмиру барқароркунӣ, муҷаҳҳазгардонии биноҳо ва майдончаҳои варзишӣ, ҳавзҳои шиноварӣ, кабудизоркунию ниҳолшинониро ба анҷом расонида, иншооти мазкурро барои қабули кӯдакону наврасон омода намоянд.”

Бояд гуфт, ки аз 10 ҳазору 352 нафар кӯдаку наврас 4 ҳазору 192 нафар дар истироҳатгоҳҳои беруназшаҳрӣ ва 6 ҳазору 160 нафарашон дар майдончаҳои солимгардонии назди муассисаҳои таълимӣ аз 11 июн то 16 августи соли равон дар 4 баст бо давомнокии 12 рӯз ройгон ба истироҳат фаро гирифта мешаванд.

Гулафшон КАРИМОВА, “ҶТ”