МАОРИФ ВА ИЛМ
Ҷумъа 20 Май 2022 08:40
8501
Имрӯз давлат ва Ҳукумати кишвар аз мо тақозо менамояд, ки ба масъалаҳои баланд бардоштани сатҳи дониш ва касбияти омӯзгорон дар ҳамаи зинаҳои таҳсилот ва тарбияи омӯзгорони ҷавони баландихтисоси ба талаботи замона ҷавобгӯй эътибори аввалиндараҷа диҳем. Зеро бунёди миллат аз маориф оғоз меёбад ва ғамхорӣ нисбат ба маориф – сармоягузорӣ барои рушди неруи инсонӣ ва ояндаи ободи давлат ва Ватан мебошад.

Муҳимияти масъалаи мазкур бори дигар дар Паёми ахири Президенти кишвар ба Маҷлиси Олӣ зикр гардид. Аз мутолиаи ин Паём дарк намудем, ки раванди таҳсил дар муассисаҳои таълимӣ ба низоми муайян даромадааст. Вале мо, мутахассисонро лозим аст, ки барои боз ҳам баланд бардоштани сатҳу сифати таҳсилот, омода намудани мутахассисони баландихтисос, омӯхтани забони давлатӣ, таъриху фарҳанги бостонии халқи хеш, боло бурдани завқу рағбати хонандагон ба омӯзиши фанҳои риёзӣ, дақиқ, табиӣ, технологияҳои иттилоотӣ ва аз худ кардани забонҳои хориҷӣ, махсусан, забонҳои русӣ ва англисӣ таваҷҷуҳи аввалиндараҷа зоҳир созем.

Баҳри иҷрои ин мақсади наҷиб бо салоҳдиди Кумитаи кор бо ҷавонон ва варзиши назди Ҳукумати Ҷумҳурии Тоҷикистон як муассисаи ниҳоят зарурӣ - Муассисаи давлатии “Маркази такмили ихтисоси кормандони соҳаи тарбияи ҷисмонӣ ва варзиш” ба фаъолият пардохт ва он дар такмили ихтисоси кормандони соҳаи тарбияи ҷисмонӣ ва варзиш кумак мерасонад.

Мо дар партави ҳидоятҳои созандаву сиёсати ҷавонпарваронаи роҳбарияти олии мамлакат мутахассисони ҷавону тозафикрро, ки бо технологияҳои навин ва донишҳои касбӣ мусаллаҳанд, ба кор қабул намудем.

Инчунин шароит ва талаботи рӯзро ба инобат гирифта, мо салоҳ донистем, ки аз ҳисоби олимони саршинос, мураббиёни шоистаи соҳа, таҷрибадорони кордидаю соҳибзавқе, ки аз нисф зиёди ҳаёти хешро ба соҳа бахшидаанд, ба сифати коршиносон қабул намоем. Зеро онҳо қодиранд, ки бо суҳбатҳои мароқангезу рӯҳпарвари варзишиашон ба шунавандагон сабақи касб омӯзонанд.

Муассисаи мо реҷаи кории худро барои шаш моҳ дар асоси дастуру ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, асноду ҳуҷҷатҳо, қонун ва қарорҳо, маҷмӯи дастурҳои тавсиявӣ дар соҳаи тарбияи ҷисмонӣ ва варзиш, намунаи ҳуҷҷатҳои меъёрию ҳуқуқии соҳавӣ мураттаб намудааст. Зеро эҳсос мешавад, ки ҳамтоёни азизи мо дар мактаби варзишии русто ба бозомӯзӣ ва ивази таҷрибаҳои касбӣ ниёз доранд.

Ҳамтоён, ҳамкасбон ва кормандони соҳаи тарзи ҳаёти солим ва умуман ҳамаи зерсохторҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон давоми соли таҳсили 2021 нек дар хотир доранд, ки аз таҳсилҳои бозомӯзии муассисаи мо ба тамом гузашта, дар соли сипаригардида, ба 207 нафар хатмкардагони муассиса мо шаҳодатнома – ҳуҷҷатҳои касбии худро тақдим намудем. Давоми таҳсилоти 6 ва 12 рӯза, ҳамзамон ба онҳо беҳтарин олимони соҳа, аҳли назари варзиш, олимону донишмандон ва профессорони илми варзиш, равоншиносон, устодони варзиши дараҷаҳои байналмилалӣ, мураббиёни шоистаи Ҷумҳурии Тоҷикистон сабақ омӯхтанд.

Дар интихоби устодон мо ба маъмурияти Донишкадаи тарбияи ҷисмонии Тоҷикистон ба номи С. Раҳимов, Донишгоҳи давлатии омӯзгории Тоҷикистон ба номи С. Айнӣ, Маркази ҷумҳуриявии дастурдиҳии Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Федератсияҳои варзишии Ҷумҳурии Тоҷикистон ва Кумитаи миллии олимпии Тоҷикистон арзи сипос менамоем, ки моро бо мутахассисони донишманд таъмин ва дастгирӣ мекунанд.

Ба устодону олимони соҳа дар симои Зарифҷон Наимов, Саидаҳмад Баҳриддинов, Холаҳмад Зафаров, Далер Сафарализода, Дилором Каримова, Фирӯз Юсуфзода, Бахтиёр Қодиров, Ҳикматулло Зайдуллоев ва дигарон миннатдорӣ баён менамоем.

Дар муассиса мо дар асоси Паёми ахири Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ барои то соли 2026 нақша – дурнамои тадбирҳои бозомӯзии кормандони соҳаро мураттаб сохтем.

Ҷомеаи меҳнатии мо, ки аслан ҷавонони фидокоранд, ба соли тозаи мелодӣ бо қадамҳои баҳодурона ворид гардида, тамоми ҷидду ҷаҳд ва донишу малакаи касбии хешро баҳри он равона хоҳанд намуд, ки дар рушду инкишофи тарзи ҳаёти солими миллат саҳми боризи худро гузоранд.

Шаҳбози ИСКАНДАР, директори Муассисаи давлатии “Маркази такмили ихтисоси кормандони соҳаи тарбияи ҷисмонӣ ва варзиш”

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
25 26 27 28 29 30 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31 1 2 3 4 5

Май 2022 c.