14-уми ноябр дар Донишгоҳи давлатии тиҷоратии Тоҷикистон чорабинии идона бахшида ба пешвози 28-солагии Иҷлосияи XVI Шӯрои Олии Ҷумҳурии Тоҷикистон ва баҳри таҳким бахшидани робитаҳои дӯстиву ҳамкориҳои дипломатӣ миёни давлатҳои Тоҷикистону Белорусия, аз ҷумла ҳамкориҳои мутақобилан судманд миёни Донишгоҳи давлатии тиҷоратии Тоҷикистон ва Донишгоҳи савдо ва иқтисоди кооператсияи матлуботи Ҷумҳурии Белорус чорабинии бошукӯҳи идона баргузор гардид.

Дар ин чорабинӣ Абдуҷаббор Раҳмонзода, ёрдамчии Президенти Ҷумуҳурии Тоҷикистон оид ба масъалаҳои рушди иҷтимоӣ ва робита бо ҷомеа, Олег Николаевич Иванов, Сафири фавқулода ва мухтори Ҷумҳурии Белорус дар Тоҷикистон, Саид Нуриддин Саид, Вазири маориф ва илми кишвар ва як қатор масъулони дигари сатҳи баланди мақомоти давлатӣ ва меҳмонон аз Донишгоҳи савдо ва иқтисоди кооператсияи матлуботи Ҷумҳурии Белорус ва устодону донишҷӯёни Донишгоҳи давлатии тиҷоратии Тоҷикистон иштирок доштанд.

Аввал дар саҳни донишгоҳ намоиши маҳсули дасти донишҷӯёни Донишгоҳи давлатии тиҷоратии Тоҷикистон ва дастархони идона пешкаши ҳозирин гардонида шуд. Дар ин намоиш ва дастархони идона аз осори фарҳангу тамаддуни мардуми ду кишвар – Тоҷикистону Белорус ва анвои гуногуни хӯрокҳои миллии тоҷикиву белорусӣ, либосҳои милии мардуми ду кишвари ба ҳам дӯст ва ғайра мавҷуд буд, ки ҳар яке диққати тамошобинон ва меҳмононро ба худ ҷалб мекард.

Пас аз анҷоми ин намоиш дар толори маҷлисии донишгоҳ ба ифтихори истиқболи Рӯзи Иҷлосияи XVI Шӯрои Олӣ ва Рӯзи Президенти Ҷумҳурии Тоҷикистон барномаи фарҳангию фароғатӣ баргузор шуд.

Дар ин қисмат донишҷӯёни донишгоҳ бо забонҳои тоҷикӣ, русӣ, англисӣ ва белорусӣ шеъру порчаҳои насрӣ дар мавзӯи ватану ватандорӣ ва дӯстиву рафоқат қироат карданд. Таронаҳои минбаъд дар толор садодода низ аз муҳаббати Ватан, дӯстиву рафоқат қисса мекарданд ва ҳамчунин сурудҳои шӯхи овозхонон бахше аз ҷолибияти дигари ин чорабинии идона буд.