Донишгоҳи байналмилалии забонҳои хориҷии Тоҷикистон ба номи Сотим Улуғзода такмили ихтисоси устодони ин муассисаи таълимиро дар хориҷи кишвар ба роҳ монда истодааст.

Дар ин бора Жило Гулназарзода, ректори Донишгоҳ имрӯз 8 феврал зимни нишасти хабарӣ иттилоъ дод.

Ӯ гуфт, ки соли гузашта 23 нафар устоди донишгоҳ дар хориҷӣ кишвар такмили ихтисос ва бозомӯзӣ намуда, курсҳои махсусро бомуваффақият хатм намуданд.

- Бо фаъолияти хуб нишон додани омӯзгорон ва тайёр намудани мутахасисони хуб донишгоҳ тасмим гирифт, ки бештар бо давлатҳои бурунмарзӣ созишномаҳо барои иштирок кардан дар семинару форум ва конфренсияҳои байналмилалӣ баста шавад. Хушбахтона ин ба мо раво дониста шуд. Ва соли гузашта 59 нафар омӯзгорон ба хориҷи кишвар сафарбар шуда, дар семенарҳо муваффақона баромад намуданд, - гуфт ректори Донишгоҳдар идома.

Ҳамчунин хонум Гулназарзода зикр кард, ки барои омӯзиши бештари донишҷӯён аз таҷрибаи пешқадами ҷаҳонӣ дар самти омӯзиши забонҳои хориҷӣ дар донишгоҳ 8 нафар омӯзгориони хориҷӣ ба кор ҷалб шудаанд.

Қобили зикр аст, ки дар солҳои охир омӯзиши забонҳои хориҷӣ дар Тоҷикистон яке аз масъалаҳои маҳварии Ҳукумати кишвар қарор гирифтааст ва Пешвои миллат муҳтарам Эмомалӣ Раҳмон ҳам барои омӯзиши бештари забонҳои хориҷӣ пайваста ба Вазорати маориф ва илм ва дигар ниҳодҳои марбута супоришу дастурҳо медиҳанд. Донишгоҳи байналмилалии забонҳои хориҷии Тоҷикистон ба номи Сотим Улуғзода ҳам, ки то соле пеш мақоми донишкадаро дошт ба ҳамин хотир ба донишгоҳи байналмилалӣ табдил дода шуд.

Наҷиба МУРОДБЕКОВА, "ҶТ"