30 апрел дар МТМУ №40-и ноҳияи Исмоили Сомонӣ бо иқдоми Сарраёсати маорифи шаҳри Душанбе маротибаи аввал озмуни шаҳрии “Ахтаракони ҳисобдон” байни тарбиягирандагони муассисаҳои таҳсилоти томактабии шаҳри Душанбе баргузор гардид.

Дар ин бора аз маркази матбуоти Сарраёсати маорифи шаҳри Душанбе хабар доданд.

Ба иттилои манбаъ озмун ҷиҳати амалигардонии 20-солаи омӯзиш ва рушди илмҳои табиатшиносӣ, дақиқ ва риёзӣ дар соҳаи илму маориф эълон гардидани солҳои 2020-2040 баргузор гардида, дар он таълимгирандагони муассисаҳои таълимии томактабии пойтахт иштирок карданд.

Гуфта мешавад, ки озмун бо мақсади баланд бардоштани малакаву маҳорати таълимгирандагони муассисаҳои томактабӣ, рушди фикрронӣ, дарк кардан ва ҳал кардани муаммоҳои арифметикӣ, сайқал додани маҳорати ҷамъу тарҳ кардани рақамҳо, тақвияти неруи зеҳнӣ, рушди малакаҳои таҳлилӣ ва тафаккури мантиқӣ ва дарёфти кӯдакони болаёқату боистеъдод доир мегардад.

Дар фарҷоми озмун 15 нафар ғолиб бо ифтихорномаи Сарраёсати маорифи шаҳри Душанбе, мукофотҳо ва роҳхат барои қабул ба синфи якуми муассисаҳои таълимии типпи нав (литсей ва гимназияҳо) аз ҳисоби буҷети ноҳияҳои пойтахт ва шаҳри Душанбе дода шуд.

Наҷиба МУРОДБЕКОВА, “ҶТ”