Айни ҳол дар ҷумҳурӣ 4866 муассисаи таҳсилоти томактабӣ, 3967 муассисаи таҳсилоти умумӣ, 62 муассисаи таҳсилоти ибтидоии касбӣ, 84 муассисаи таҳсилоти миёнаи касбӣ ва 46 муассисаи таҳсилоти олии касбӣ фаъолият менамоянд, ки дар ин муассисаҳо 2660208 нафар тарбиятгиранда, хонанда ва донишҷӯ ба таълиму тарбия фаро гирифта шудаанд.

Дар ин бора Икром Субҳонзода, директори Агентии назорат дар соҳаи маориф ва илми назди Президенти Ҷумҳурии Тоҷикистон 9 феврал зимни нишасти матбуотӣ хабар дод.

Номбурда афзуд, ки дар муассисаҳои таълимии болозикр 158293 омӯзгор ва мураббӣ фаъолият намуда, ба таълиму тарбияи кӯдакон, хонандагон ва донишҷӯён машғул мебошанд, ки аз ин шумора 100618 нафар ё 64 фоизашро бонувон ташкил медиҳанд.