Дар нимсолаи якуми соли ҷорӣ аз ҷониби Агентии назорат дар соҳаи маориф ва илми назди Президенти Ҷумҳурии Тоҷикистон 523 аттестатсияи давлатӣ, 360 аккредитатсияи давлатӣ, 13 азнавбарасмиятдарорӣ ва125 ташхиси иҷозатномадиҳии муассисаҳои таълимӣ анҷом дода шудааст.

Субҳон Икромзода, директори Агентии назорат дар соҳаи маориф ва илм 2 август зимни нишасти хабарӣ бо зикри ин нукта ҳамзамон гуфт, ки дар натиҷа амали иҷозатномаи 7 муассиса ( "Мактаби хусусии ба номи Мирзо Ҳасанзода" дар н. Мастчоҳ, Муассисаи ғайридавлатии таълимии "Ояндаи дурахшон" дар ш. Бӯстон, ҶДММ "Хонаи британиягӣ"( кӯдакистон) дар ш. Душанбе, ҶДММ "Ҳисор" дар ш. Ҳисор, Маркази таълимии "Чароғи дониш" дар ш. Душанбе, Ташкилоти ҷамъиятии хайриявии "Сафои Ватан" дар ш. Душанбе ва ихтисосҳои тиббии Муассисаи таълимии ғайридавлатии "Коллеҷи техникии шаҳри Хуҷанд" боздошт ва қатъ карда шуд.

-Дар ин давра рейтинги 30 адад муассисаҳои таҳсилоти олии касбӣ гузаронида ва ҷамъбаст карда шуд. Дар натиҷа Донишгоҳи миллии Тоҷикистон бо гирифтани 236 хол сазовори ҷойи якум, Донишгоҳи давлатии тиббии Тоҷикистон ба номи А. И. Сино бо гирифтани 227 хол сазовори ҷойи дуюм, Донишгоҳи техникии Тоҷикистон ба номи академик Осимӣ ва Донишгоҳи давлатии Хуҷанд ба номи Б. Ғафуров бо гирифтани холҳои баробар, яъне 221- холӣ сазовори ҷойи сеюм дониста шуданд, - гуфт С. Икромзода.