Давоми шаш моҳи соли 2021 хонандагони муассисаҳои таҳсилоти миёнаи умумии Вилояти Мухтори Кӯҳистони Бадахшон дар олимпиадаҳои фаннӣ, номӣ ва онлайнӣ фаъолона ширкат намуда, ба натиҷаҳои назаррас ноил шуданд, - гуфт дар нишасти матбуотӣ сардори Раёсати маорифи ВМКБ Одинашо Мардов.

Номбурда дар шарҳи андешаи хеш гуфт, дар даври ниҳоии олимпиадаи фаннӣ аз фанҳои сикли табиӣ – риёзӣ ва гуманитарӣ хонандагони вилоят шаш медали тилло, 17 нуқра ва 58 медали бринҷиро ба даст оварданд, ки дар умум 81 медалро соҳиб шуданд. Инчунин, 82 нафар хонандагони МТМУ – и вилоят дар олимпиадаҳои байналмилалии “Архимед” дар Ҷумҳурии халқии Чин ва олимпиадаи “Кенгуру” дар кишвари Австралия аз фанни математика иштирок карда, соҳиби 19 медал гаштанд. Аз инҳо, се медали тилло, 6 нуқра ва 10 адад биринҷӣ мебошанд. Ин беҳтарин дастоварди соҳаи маорифи вилоят ба ифтихори 30 - солагии Истиқлол мебошад.

- Яке аз самтҳои сиёсати Ҳукумати Ҷумҳурии Тоҷикистон фарогирии кӯдакон ба таълиму тарбия ва муассисаҳои таҳсилоти томактабӣ мебошад. Дар ВМКБ кӯдакони то панҷсола 25 ҳазору 119 нафарро ташкил медиҳад, ки аз ин 2 144 нафар кӯдак ба кӯдакистон ва 6 491 нафар кӯдак ба марказҳои рушди барвақтии кӯдак фаро гирифта шудаанд. Аммо барои 16 488 нафар кӯдак бошад, ҳанӯз ягон кӯдакистон ё марказҳо ташкил карда нашудасст, - гуфт, сардори раёсати маорифи вилоят.