Вазорати маориф ва илми Ҷумҳурии Тоҷикистон мегӯяд, ки дар соли 2022, 318 омӯзгор ба миқдори 1 миллиону 800 ҳазор сомонӣ аз қарзҳои имтиёзнок истифода намудаанд.

Дар ин бора муовини вазири маориф ва илми кишвар Шукрулло Хайрзода 2 феврал зимни нишасти хабарӣ иттилоъ дод.

Ӯ гуфт, ки дар моддаҳои 52 ва 53 Қонуни Ҷумҳурии Тоҷикистон “Дар бораи маориф” барои омӯзгорон имтиёзҳоеро пешбинӣ намудааст, ки онҳо аз ин имтиёзҳо бархӯрдоранд.

- Яке аз имтиёзҳое, ки дар соли 2022 барои омӯзгорон пешбинӣ шудааст, ин қарзҳои имтиёзнок ба ҳисоб меравад, ки 318 омӯзгор ба миқдори 1 миллиону 800 ҳазор сомонӣ аз он истифода намудаанд, - гуфт муовини вазир.

Хайрзода ҳамзамон гуфт, ки барои омӯзгорони ҷавон низ имтиёзҳо пешбинӣ шудааст, ки аз ҷумла 128 нафар омӯзгори ҷавон бо қитъаҳои замини наздиҳавлигӣ таъмин гардиданд. Инчунин ба 10 256 нафар омӯзгори ҷавон, дар муддати се соли аввали фаъолияташон 10% иловапулӣ ба музди маошашон илова мегардад.

Ҳамзамон иловатан гуфта шуд, ки мутобиқи Кодекси андози Ҷумҳурии Тоҷикистон омӯзгорон аз андози заминҳои наздиҳавлигӣ озод карда шудаанд.