Дар соли таҳсили 2023-2024 дар муассисаҳои таълимии Вазорати маориф ва илми Ҷумҳурии Тоҷикистон 4353 нафар омӯзгор намерасидааст.

Дар ин бора Раҳим Саидзода, вазири маориф ва илми кишвар 2 феврал зимни нишасти хабарӣ ба рӯзноманигорон иттилоъ дод.

Вазир қайд намуд, ки "дар ҳақиқат дар охири соли 2021-ум 4343 нафар омӯзгор намерасид,  лекин бо корбарӣ имсол мо ин нишондиҳандаро тахминан ба 300 нафар оварда расонидем".

Ҳамчунин зикр гардид, ки бо мақсади таъмини кадрҳои омӯзгорӣ соли 2023 дар 14 муассисаи таҳсилоти миёнаи касбӣ ва 13 муассисаи таҳсилоти олии касбии кишвар тақсимоти мутахассисони ҷавон гузаронида шуд.

-Мо бо розигии Ҳукумати кишвар донишҷӯёни курсҳои чорумро низ ба муассисаҳои таълимӣ ҷалб кардем. Дар асоси тақсимоти мазкур 3432 нафар хатмкардаи муассисаҳои таҳсилоти миёна ва олии касбӣ, аз ҷумла, 2685 нафар таҳсилоти касбӣ ва 747 нафар таҳсилоти миёнаи касбӣ ба муассисаҳои таҳсилоти миёнаи умумӣ сафарбар гардиданд, ки аз шумораи мазкур 669 нафар тибқи Квотаи президентӣ мебошад. Аз ин теъдод 2386 нафар ба ҷойи кор ҳозир гардид, - илова кард вазир.