Дар соли таҳсили 2021-2022 Донишгоҳи давлатии Хоруғ (ДДХ) ба номи Моёншо Назаршоевро 969 нафар донишҷӯ хатм намуда, аз ин теъдод ҳафт нафар дорандаи дипломи аъло мебошанд, - гуфт Гулзорхон Юсуфзода, ректори ДДХ зимни нишасти хабарӣ.

Ӯ афзуд, ки аз 969 нафар, 306 хатмкунандагони равияи омӯзгорӣ буда, аз ҷумлаи онҳо 107 нафар дорандаи Квотаи президентӣ мебошанд. Аз 306 нафар хатмкунандагони равияи омўзгории шакли таҳсили буҷавӣ 58 нафар ба сафи Қувваҳои Мусаллаҳи Ҷумҳурии Тоҷикистон, 27 нафар ба таҳсили магистратура ва 221 нафар тибқи роҳхати Вазорати маориф ва илми Ҷумҳурии Тоҷикистон ба шуъбаҳои маорифи шаҳру навоҳии Ҷумҳурии Тоҷикистон фиристонда шуданд.

-Ҳайати профессорону омӯзгорони 21 кафедраи донишгоҳ ҳоло аз болои 13 самт корҳои илмӣ-тадқиқотӣ ва чор мавзӯи фармоишӣ, ки аз тарафи Вазорати маориф ва илми Ҷумҳурии Тоҷикистон маблағгузорӣ мешаванд, кору фаъолият доранд. Дар донишгоҳ ду нафар омӯзгор рисолаи номзадиро ҳимоя намуда, ҳафт нафари дигар рисолаҳои худро барои дифоъ ба шӯроҳои диссертатсионии кишвар пешниҳод намуданд, - иброз дошт ректор.