Ин нуктаро Ғанизода Ҷамшед, ректори Донишкадаи санъати тасвирӣ ва дизайни Тоҷикистон зимни нишасти хабарӣ бо рӯзноманигорон баён дошт.                     

Ӯ гуфт, ки ба ихтисоси дизайн ва меъморӣ таваҷҷуҳ зиёд гардида, аксари довталабон дар ҳамин ихтисос таҳсил намудан мехоҳанд. Мушкилот дар он аст, ки аз норасоии мутахассисони касбии ин соҳа танқисӣ мекашем.

- Новобаста аз он ки донишкада навтаъсис аст, дар соли ҷорӣ нақша дорад, ки ҳадди ақал як ихтисоси он аз аккредитатсияи байналмилалӣ гузарад, - қайд намуд ректори донишкада.

Мавриди зикр аст, ки дар донишкада факултаи тайёрӣ ва таҳсилоти фосилавӣ таъсис дода шуда, дар он шӯъбаи тайёрӣ ва маркази бачагонаи рассомӣ фаъолиятро оғоз намудаанд. Наврасону ҷавонони лаёқатманд метавонанд дар ин факулта касби интихобнамудаи худро сайқал диҳанд.