Ҷило Гулназарзода, ректори Донишкадаи давлатии забонҳои Тоҷикистон ба номи Сотим Улуғзода имрӯз зимни нишасти матбуотӣ қайд кард, ки ба самти робитаҳои байналмилалӣ дар донишкада таваҷҷуҳи хоса зоҳир мегардад. Айни замон шумораи созишномаҳои донишкада бо муассисаҳои таҳсилоти олии касбии хориҷи кишвар ба 52 адад расидааст. 

Номбурда дар идома гуфт, дар ин давра 648 нафар шаҳрванди хориҷӣ аз ҷумҳуриҳои Туркманистон, Қирғизистон, Узбекистон, Афғонистон ва Федератсияи Русия ба таҳсил фаро гирифта шуданд. Инчунин, 17 нафар донишҷӯёни хориҷӣ ба ҳайси шунавандаи забони тоҷикӣ ва русӣ дар назди кафедраҳо таҳсил намуда истодаанд.

Зикр шуд, ки дар донишкада 5 нафар хориҷиён фаъолияти омӯзгорӣ ва волонтёрӣ намуданд, ки аз инҳо 1 нафар шаҳрванди Кореяи Ҷанубӣ, 2 нафар шаҳрванди Ҷумҳурии Мардумии Чин, 1 нафар шаҳрванди Ҷумҳурии Қазоқистон ва 1 нафар волонтёр аз Ҷумҳурии Ҷопон мебошанд.

Ҳошим РАҲМАТУЛЛОЕВ, “ҶТ”