Дар Донишгоҳи миллии Тоҷикистон (ДМТ) барои баррасии фаъолияти донишгоҳ дар соли 2016 ва вазифаҳо барои соли 2017 ҷамъомад доир гардид. Дар он мушовири бахши Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Муҳаммадшариф Бобошозода, сардори Раёсати илм ва маърифати Дастгоҳи иҷроияи Президенти Ҷумҳурии Тоҷикистон Сайфиддин Давлатзода, муовини вазири маориф ва илми Ҷумҳурии Тоҷикистон Бозоралӣ Одиназода, сардори Раёсати соҳаи иҷтимоии Вазорати рушди иқтисод ва савдои Ҷумҳурии Тоҷикистон Таваккал Маликов ва устодону кормандони донишгоҳ ҳузур доштанд.

Муҳаммадюсуф Имомзода, ректори ДМТ ҳисоботи яксоларо ба таври фишурда ба самъи ҳозирин расонида, аз бурду бохти донишгоҳ дар панҷ самт: таълим, тарбия, илм, робитаҳои байналмилалӣ ва хоҷагидорӣ дар соли 2016 гуфт.

Дар соли 2016 раёсати донишгоҳ дар самти дифои рисолаҳои номзадӣ ва докторӣ корҳои самараноку назаррас ба анҷом расонида, дар донишгоҳ 12 нафар рисолаҳои докторӣ ва 66 нафар рисолаҳои номзадии худро дифоъ намуданд.

М. Имомзода яке аз дастовардҳои муҳими раёсати ДМТ дар соли равонро гузаштан ба натиҷагирии фаъолияти донишҷӯён аз ҷониби омӯзгор тариқи журналҳои электронӣ арзёбӣ кард. Ба гуфати ректор: “Қаблан факултети муносибатҳои байналхалқӣ ба таври пилотӣ ба ин низом гузашта буд ва аз оғози соли 2016 дар ҳамаи факултетҳои донишгоҳ натиҷагирии фаъолияти ҳаррӯзаи донишҷӯён тавассути журналҳои электронӣ ба роҳ монда шуд».

Ректори ДМТ аз  надонистан ва бехабар будани баъзе устодон нисбат ба гузоштани холи донишҷӯён дар низоми кредитӣ нигаронӣ карда гуфт: “Новобаста аз назорати пайвастаи раёсати таълим, бурдани корҳои фаҳмондадиҳӣ байни омӯзгорон ва 10 сол мавҷуд будани низоми таҳсилоти кредитӣ, аммо то ҳол ҳастанд баъзе омӯзгороне, ки аз тарзу усулҳои баҳогузорӣ дар низом хабардор нестанд”.