12 июл дар Донишгоҳи миллии Тоҷикистон бо иштироки раёсати донишгоҳ ва рӯзноманигорон нишасти матбуотӣ баргузор гардид.

Хушвахтзода Қобилҷон, ректори донишгоҳ зимни нишаст аз бурду бохт ва фаъолияти пурсамари ДМТ давоми нимсолаи аввал ибрози назар намуда, таъкид кард, ки дар рейтинги муассисаҳои таҳсилоти олии касбии Ҷумҳурии Тоҷикистон, ки моҳи апрели соли ҷорӣ аз ҷониби Агентии давлатии назорат дар соҳаи маориф ва илми назди Президенти Ҷумҳурии Тоҷикистон аз рӯи 36 нишондиҳандаи таълимию илмӣ роҳандозӣ гардид, донишгоҳ дар байни 31 муассисаи таҳсилоти олии касбии ҷумҳурӣ бо гирифтани 182 хол сазовори ҷойи 1-ум гашт, ки дастоварди назарраси раёсати донишгоҳ дар давраи ҳисоботӣ мебошад.

Зикр гардид, ки қисми тарбиявии донишгоҳ дар нимсолаи аввал ҷиҳати ташкил ва баргузории чорабиниҳои сатҳи ҷумҳуриявию байналмилалӣ саҳми назаррас гузоштааст. Ва дар 6 моҳи аввали соли 2021 аз ҷониби устодону кормандони донишгоҳ 3 нахустпатент гирифта шуд, ки ин аз фаъолияти пурсамари раёсати донишгоҳ далолат медиҳад.