Вазири маориф ва илми Ҷумҳурии Тоҷикистон Муҳаммадюсуф Имомзода, аз донишҷӯёни тоҷике, ки дар донишгоҳҳои Қирғизистон таҳсил мекунанд, даъват ба амал овард, ки то мӯътадил шудани робитаҳои ду кишвар аз сафар ба ин кишвар худдорӣ намоянд.

Ин нуктаро ӯ имрӯз зимни нишасти матбуотӣ баён дошт. Вазири маориф гуфт, ки амнияти онҳоро касе кафолат дода наметавонад ва ин даъват ба хотири таъмини амнияти шаҳрвандони кишвар аст.

“То имрӯз амнияти шаҳрвандони тоҷик дар Қирғизистон таъмин карда намешавад. Ба саломатии онҳо касе кафолат дода наметавонад. Бо ҳар баҳона ба онҳо метавонанд фишор оваранд. Ҳоло мо аз донишҷӯён хоҳиш намудем, ки нараванд, чун номуайянӣ аст”, - гуфт Имомзода.

Бино ба иттилои Вазири маориф ва илми Ҷумҳурии Тоҷикистон дар мактабҳои олии Қирғизистон беш аз 2 ҳазор шаҳрванди Тоҷикистон таҳсил мекунанд.

Баъди баста шудани марз аз ҷониби кишвари Қирғизистон ин донишҷӯён ба Вазорати маориф муроҷиат кардаанд, ки ба гуфтаи вазири маориф онҳоро ба донишгоҳҳои гуногуни кишвар ба ихтисосҳои мувофиқи худашон қабул кардаанд ва ҳатто аз бархеи онҳо ҳуҷҷати тасдиқкунунда талаб накардаанд. Дар ҳоли ҳозир 464 нафари он тибқи тартиби муқарраршуда бе ҳуҷҷати аслӣ таҳсил доранд.

“Ҳуҷҷати тасдиқкунанда - маълумотномаи академӣ, фармоиши таҳсил ва дигар маводи таҳсил. Мо намедонем ҳамин шаҳрванде, ки ба мо муроҷиат кардааст, оё воқеан ҳам дар мактабҳои олии Қирғизистон таҳсил мекунад ё не”,-гуфт вазири маориф.

Ёдовар мешавем, ки Қирғизистон шурӯъ аз моҳи апрели соли гузашта, пас аз задухӯрдҳои марзӣ сарҳадҳояшро ба рӯи Тоҷикистон баст ва гуфт то поёни ҳалли ин мушкилиҳо марзҳо баста мемонанд.