МАОРИФ ВА ИЛМ
Шанбе 28 Ноябр 2020 07:04
7438
Бо сабаби пандемияи коронавирус ва баста шудани роҳҳо донишҷӯёне, ки дар мактабҳои олии кишварҳои хориҷа таҳсил мекарданд, ба муассисаҳои таълимиашон рафта натавонистанд.

Дар баробари ин, Вазорати маориф ва илми Ҷумҳурии Тоҷикистон кӯшиш намуда истодааст, ки ин донишҷӯёнро барои идомаи таҳсил ба кишварҳои хориҷӣ равон кунад. Аз ин рӯ, шурӯъ аз аввали барӯйхатгирии донишҷӯёне, ки дар хориҷи кишвар таҳсил мекунанд, оғоз ёфт.

Дар эълони барӯйхатгирии донишҷӯён, ки дар сомонаи расмии Вазорати маориф ва илми Ҷумҳурии Тоҷикистон ҷой дода шудааст, омадааст: “Аз донишҷӯёне, ки дар соли таҳсили 2020-2021 ба муассисаҳои таҳсилоти олӣ ва илмии хориҷи кишвар дохил шудаанд ва донишҷӯёне, ки ҳангоми таътил ба Ҷумҳурии Тоҷикистон омада, вобаста ба вазъи эпидемиявӣ ҷорӣ шудани маҳдудият ва баста шудани сарҳадҳо ба донишгоҳҳои хориҷи кишвар баргашта натавонистанд, хоҳиш карда мешавад, ки тибқи ҷадвали замимашуда ба суроғаи электронии Маркази барномаҳои байналмилалии Вазорати маориф ва илм маълумоти заруриро ирсол намоянд”.

Мусриф Амоншоев, хатмкардаи Донишгоҳи славянии Русияву Тоҷикистон, ки ҳамроҳи 4 ҳамсабақаш ба Донишгоҳи “Дӯстии халқҳо”-и Русия дохил шудааст, мегӯяд наметавонад, ки барои оғози таҳсил ба Русия сафар кунад.

Ӯ мегӯяд, 5 нафар ба донишгоҳ аллакай ҳуҷҷатҳояшонро равон кардаанд ва аз он ҷо гуфтаанд, ки гурӯҳҳоро ба журналистикаи муосир ва журналистикаи байналмилалӣ ҷудо мекунанд, баъдан дарсҳоро шурӯъ хоҳанд кард.

- Мо ҳамагӣ як рӯз дарси онлайнӣ хондем, як ду муаллимро дидем тамом. Ҳоло интизорем, ки кай дарсҳоямон шурӯъ мешавад. Ҳоло муайян нест, ки кай дарсҳо оғоз меёбанд. Мо ҳуҷҷатҳоямонро равон кардем, фармони мо баромадааст, мо аллакай магистранти ҳамон донишгоҳ ҳастем, –иброз намуд Мусриф.

Ҳамзамон донишҷӯи дигар Саъдулло Юсупов, ки дар Ҷумҳурии Мардумии Чин таҳсил мекунад, мегӯяд дарсҳояшон айни ҳол ба таври фосилавӣ оғоз шудааст ва маводҳои дарсиро аз сомонаи донишгоҳ гирифта, тариқи онлайнӣ дарс мегузаранд.

Ӯ мегӯяд, дар сомонаи Вазорати маориф онлайн-пурсишномаро пур намудааст ва интизори эълони навбатӣ аст.

Тибқи иттилои Шодиён Исматулло, директори муассисаи давлатии “Маркази барномаҳои байналмилалӣ”-и Вазорати маориф ва илми кишвар барои сабти номи донишҷӯён дар сомонаи расмии Вазорати маориф ва илм пурсишнома ҷой дода шудааст ва хоҳишмандон метавонанд, бо пур кардани он худро ба қайд гиранд.
Ба гуфтаи ӯ, онҳо ҳамарӯза рӯйхати чунин донишҷӯёнро ба Вазорати корҳои хориҷии кишвар пешниҳод мекунанд ва Вазорати корҳои хориҷӣ дар якҷоягӣ бо сафоратҳои кишварҳо барои ирсоли донишҷӯён чораҷӯӣ мекунад.

- Донишҷӯёне, ки дар Белорусия ва Украина таҳсил мекунанд, аллакай тариқи парвозҳои чартерӣ ба он кишварҳо рафтанд. Онҳо таҳсили худро оғоз намуданд. Инчунин, мо донишҷӯёнеро, ки дар Қазоқистон таҳсил мекунанд, рӯйхат карда, ба Вазорати корҳои хориҷӣ пешниҳод намудем,- мегӯяд ӯ.

Мавсуф таъкид намуд, ки онҳо кӯшиш намуда истодаанд, то пеш аз ҳама донишҷӯёни курси аввали ихтисосҳои тиббиву техникиро равон кунанд. Чунки дарсҳои амалии ихтисосҳои тиббиву техникӣ бештар аст.

Иттилоъ дода шуд, дар пурсишномае, ки дар сомонаи Вазорати маориф ва илм ҷой дода шудааст, донишҷӯён ҳамаи маълумоти худро ворид мекунанд.

- Мо 600 нафарро аз Русияву Қазоқистон рӯйхат карда, ба Вазорати корҳои хориҷӣ пешниҳод намудем. Боз 1500 нафарро ба қайд гирифтем. Ба ғайр аз ин, донишҷӯён дар Вазорати корҳои хориҷӣ низ ба қайд гирифта мешаванд. Дар 4-5 рӯз қариб 1500 нафарро ба қайд гирифтем. Онҳоро ба Вазорати корҳои хориҷӣ барои корбарӣ ирсол менамоем,- гуфт И. Шодиён.

Ба гуфтаи мавсуф онҳо як синфхонаи компютерӣ барои курсҳои якум, ки ба таҳсили фосилавӣ ошно нестанд, ташкил намудаанд. Он барои 50 нафар пешбинӣ шуда, интернеташ доим фаъол аст ва мутахассисон низ ба донишҷӯён кумак мекунанд. Вале гуфта шуд, ки аксарияти донишҷӯён дарсҳои худро ба таври фосилавӣ дар хонаҳояшон мехонанд.

Тибқи иттилои Вазорати маориф ва илми кишвар 34 065 донишҷӯи тоҷик дар мактабҳои олии хориҷӣ таҳсил мекунад. Аз ин шумора бештараш (24604 нафар) дар донишгоҳҳои Русия таҳсил доранд. Ҷои дуввумро донишгоҳҳои Чин мегиранд, ки 4075-ро қабул кардаанд. Ҳамин тавр, Белорус (1151 нафар), Қазоқистон (959 нафар) ва Қирғизистон (698 нафар) низ дар ин рӯйхат қарор доранд. Дар мактабҳои олии ИМА (321 нафар), Лаҳистон (293 нафар), Туркия (283 нафар), Украина (220 нафар), Олмон (172 нафар) ва Ҳиндустон (147 нафар) низ донишҷӯёни тоҷик таҳсил мекунанд.

Эзоҳи худро нависед



Рамзҳо дар расм