Соли 2023 Донишгоҳи давлатии тиҷоратии Тоҷикистон бо мақсади баланд бардоштани сифати таҳсилот ва омӯхтани таҷрибаи пешқадами хориҷӣ бо якчанд донишгоҳҳои мухталифи олии кишварҳои Иттиҳоди Давлатҳои Мустақил, Ҷумҳурии Мардумии Чин, Амрико, Кореяи Ҷанубӣ ва Британияи Кабир шартномаҳои дуҷонибаро ба имзо расонид.

Ин нуктаро 31 январ Назарзода Хайрулло, ректори донишгоҳ зимни нишасти матбуотӣ иброз намуд.

Ӯ дар идома гуфт, соли гузашта донишгоҳ 12 созишномаи ҳамкориро бо МТОК хориҷи кишвар ба имзо расонида, 8 созишномаву меморандумро таҳия ва барои иҷозат ба унвонии Вазорати маориф ва илми Ҷумҳурии Тоҷикистон равон намудааст.

Самти дигари муҳими фаъолияти байналмилалии донишгоҳ ин ҷалби грантҳо ба ҳисоб рафта, айни замон 8 лоиҳаи байналмилалӣ дар донишгоҳ амалӣ шуда истодааст. Дар ин давра 5 дархости лоиҳавӣ омода гардида, ба шарикони рушд барои ҳамоҳангӣ пешниҳод шудааст.