Дар Донишгоҳи давлатии тиббии Тоҷикистон ба номи Абӯалӣ ибни Сино ду ихтисоси нав - “Биохимияи клиникӣ” ва “Психологияи тиббӣ” таъсис дода шудааст.

Маҳмадшоҳ Гулзода, ректори ДДТТ 7 август зимни нишасти хабарӣ гуфт, ки ин қадами нав дар рушди ин соҳаҳо муҳим мебошад. Ӯ зикр кард, ки қабули донишҷӯён ба ихтисосҳои нав аз соли нави таҳсили 2025-2026 ба роҳ монда мешавад.

- Донишгоҳ аллакай заминаи мусоидро барои омода намудани мутахассисони босалоҳияти самти озмоиши клиникӣ омода намудааст. Вобаста ба ин дар пойгоҳи Пажӯҳишгоҳи тибби бунёди донишгоҳ дастгоҳҳои муосири озмоишӣ харидорӣ гардидаанд, - баён дошт ректор.

Инчунин, номбурда гуфт, ки барои таъмини таҳсилоти босифат баҳри омода намудани мутахассисони самти психологияи тиббӣ созишномаи ҳамкорӣ бо Донишгоҳи тадқиқотии тиббии Приволожскии Федератсияи Русия ва Донишгоҳи улумпизишкии Шерози Ҷумҳурии Исломии Эрон ба имзо расонида шуд.

- Дар доираи ин созишномаҳо мубодилаи академии омӯзгорон, таҷрибаомӯзӣ ва машғулиятҳои муштарак амалӣ карда мешаванд, ки аз рӯи барномаҳои нави таълимӣ мутахассисон омода карда мешаванд, - илова кард ректор.