Таҳлили натиҷаи аттестатсия нишон медиҳад, ки аз 343 нафар хатмкунандаи таҳсили рӯзона ва ғоибона 334 нафар (97,3%) бо мувафақият аз аттестатсия гузашта, 3 нафар бо гирифтани дипломи намунавии “аъло” донишкадаро хатм намудаанд.

Дар ин бора Тоҷиддин Асомуддинзода, ректори Донишкадаи исломии Тоҷикистон ба номи Имоми Аъзам Абӯҳанифа, 27 июл, зимни нишасти хабарӣ ба рӯзноманигорон иттилоъ дод.

Ба таъкиди номбурда айни замон шумораи умумии донишҷӯён ба 1079 нафар (аз он 225 нафар духтар) буда, дар факултети филологияи Шарқ 650 нафар аз он ҷумла, таҳсили рӯзона 531 нафар ва аз рӯи таҳсили ғоибона 119 нафарро ташкил медиҳад. Донишкада аз оғози соли таҳсили 2017–2018, 5 ихтисос аз рӯи зинаи таҳсили бакалавр амал намуда, ихтисосҳои мазкур ба кафедраҳои пешбари факултаҳои филологияи Шарқ ва улуми исломӣ вобаста шудааст.

Дар идома бо хушнудӣ иброз гардид, ки соли ҷори аз ҷониби Пешвои миллат муҳтарам Эмомалӣ Раҳмон дар кӯчаи Низоми Ганҷавии шаҳри Душанбе санги асоси Донишкадаи исломии Тоҷикистон ба номи Имоми Аъзам – Абӯҳанифа Нуъмон ибни Собит гузошта шуд. Донишкада бо тарҳи нав аз 7 ошёна иборат буда, бо тамоми шароитҳои наву замонавӣ барои 1500 нафар донишҷӯ дар як баст бо харҷи 136 миллион сомонӣ сохта ба истифода дода хоҳад шуд.