Шодӣ Сафаров, ректори Донишкадаи тарбияи ҷисмонии Тоҷикистон ба номи С. Раҳимов 10 феврал зимни нишасти хабарӣ иброз дошт, ки раёсати донишкада дар асоси мактуби расмии Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба варзишгароне, ки барои иштирок дар мусобиқаҳои байналмилалӣ омодагӣ мебинанд, графикаи озоди дарсӣ пешбинӣ намудааст ва имрӯз ба он 350 нафар варзишгар фаро гирифта шудаанд.

Дар идома таъкид гардид, ки имрӯз 300 нафар дастпарварони донишкада аъзои дастаҳои мунтахаби варзишии мамлакат мебошанд. Инчунин раёсати донишкада ҷиҳати босамар ба роҳ мондани фаъолият дар самти варзиш бо 11 давлати ҷаҳон муносибатҳои корӣ ба роҳ мондааст. Дар асоси квотаҳои пешбинигардидаи Федератсияи байналмилалии донишҷӯён ду нафар аз дастпарварони донишкада – Шоҳида Қаландарова ва Раҳмон Мансур моҳи августи соли ҷорӣ дар мусобиқаи Ассотсиатсияи донишҷӯёни мактабҳои олии ҷаҳон, ки дар шаҳри Пекин баргузор мегардад, аз намуди варзиши таэквондо ва дзюдо иштирок менамоянд.
   
Қиёмиддин МАҲМАДҶОНОВ, “ҶТ”