Ба таъкиди Усмон Маҳмадёрзода, ректори Донишгоҳи аграрии Тоҷикистон ба номи Шириншоҳ Шоҳтемур, дар донишгоҳ ба мустаҳкамшавии робитаҳои байналмилалӣ аҳамияти ҷиддӣ дода мешавад.

Ӯ 14 июл зимни нишасти матбуотӣ бо зикри ин нукта ҳамчунин гуфт: “Донишгоҳ айни замон бо 140 донишгоҳу донишкадаҳои 24 давлати дунё ва 21 барномаи ташкилотҳои хориҷӣ созишномаи ҳамкорӣ дорад. Дар давоми 6 моҳи соли ҷорӣ ба донишгоҳ аз хориҷи кишвар 70 нафар меҳмонон ташриф оварданд. Дар рафти вохӯриҳо бо 10 муассисаи таҳсилоти олии касбӣ ва созмону ташкилотҳои байналмилалӣ созишномаи ҳамкорӣ дар бахшҳои мухталиф баста шуданд”.

- Дар семинар ва конференсияҳои илмӣ – амалии байналмилалӣ 41 нафар олимони донишгоҳ иштирок ва баромад намуданд. Аз ин шумора 10 нафар соҳиби сертификат шуданд ва ду нафар докторанти донишгоҳ дар озмуни беҳтарин мақолаи илмӣ дар доираи лоиҳаи Барномаи рушди СММ - “Тағйирёбии иқлим ва ҳамбастагии обӣ – энергетикӣ ва бехатарии озуқаворӣ дар Осиёи Марказӣ” баромад намуда, ғолиби озмун гардиданд, - гуфт Усмон Маҳмадёрзода.

Гуфта шуд, ки маҳз дар доираи созишномаҳои ҳамкорӣ 6 нафар донишҷӯи донишгоҳ барои идомаи таҳсил ба пойгоҳи Донишгоҳи давлатии аграрии шаҳри Новосибирск, Донишгоҳи давлатии аграрии ба номи Пётри 1 шаҳри Воронеж ва Академияи давлатии кишоварзии шаҳри Костромаи Федератсияи Русия равона гардиданд.

Ҳошим РАҲМАТУЛЛОЕВ “ҶТ”