МАОРИФ ВА ИЛМ
Якшанбе 26 Май 2024 08:52
1064
Имрӯз 26 июн, Пешвои миллат, муҳтарам Эмомалӣ Раҳмон бо мақсади шиносоӣ бо иқтидорҳои мавҷудаи истеҳсолӣ ва дастовардҳои соҳаи иқтисодиву иҷтимоӣ ба ноҳияи Шуғнони Вилояти Мухтори Кӯҳистони Бадахшон ташриф овард. Ӯро роҳбарият ва сокинони ноҳияи Шуғнон бо самимияти хосса, дар фазои тантанавии идона истиқбол гирифтанд.

Пешвои миллат, муҳтарам Эмомалӣ раҳмон нахуст дар расми мавриди истифода қарор додани мактаби наву замонавӣ дар деҳаи Кушки ноҳияи Шуғнон иштирок намуд.

Мактаби наву замонавӣ барои 464 ҷойи нишаст дар 1 баст пешбинӣ шуда, аз 24 синфхона, толори навбунёди варзишӣ бо 140 ҷойи нишаст, китобхона бо 5 ҳазор нусха китоби таълимиву бадеӣ ва китобхонаи муосири электронӣ бо 22 компютер, шабакаи доимии интернет, толори фарҳангӣ бо 170 ҷойи нишаст, майдончаҳои варзишӣ барои футбол, волейбол ва баскетбол, ҳамзамон барои такмили лаёқати хонандагон синфхонаҳои таълимӣ-истеҳсолӣ, аз ҷумла синфхонаҳои дӯзандагиву қаннодӣ, синфхонаи коркарди чӯбу тахта, ошхонаи замонавӣ барои 120 нафар дар як вақт, баҳри таъмини сиҳатии доимӣ мактаб ҳамчунин аз утоқи хизматрасонии тиббӣ, аз ҷумла дандонпизишк ва утоқи духтури кӯдакону наврасон иборат мебошад.

Сохтмони мактаб аз ҳисоби марҳилаи III-юми лоиҳаи «Таҷдид ва идомаи сохтмони мактабҳо» муштарак бо маблағгузории Ҳукумати Ҷумҳурии Тоҷикистон ва Бонки Исломии Рушд бо арзиши 1 миллиону 802 ҳазор доллари ИМА татбиқ шуда, он дорои муосиртарин шароити илмомӯзӣ мебошад.

Баъди ифтитоҳи бинои мактаб Президенти мамлакат Эмомалӣ Раҳмон дар сӯҳбат бо омӯзгорону хонандагон ва фаъолони ноҳияи Шуғнон сӯҳбати самимӣ намуда, оид ба дастгирии ҳамаҷонибаи Ҳукумати мамлакат барои рушди соҳаи маориф ва беҳдошти сатҳи таълиму тарбия, ҷалби фарзандон ба таҳсил андешаронӣ намуд.

Инчунин, Сарвари давлат ба сохтмончиён барои иҷрои корҳои босифат баҳои баланд дода, иброз дошт, ки дар даврони соҳибистиқлолӣ дар кишвар шумораи мактабҳои шакли нав бояд боз ҳам афзоиш дода шаванд. Ин имкон медиҳад, ки шароити таълиму тадрис беҳтар гардида, волидон аз рафти донишомӯзии фарзандон ҳамеша тариқи марказҳои нави иттилоотӣ огоҳ гарданд.

ДҲамзамон муаллимону хонандагон дар навбати худ ба Сарвари давлат барои дастгирии ҳамаҷониба ва ғамхориҳои рӯзафзун изҳори сипосу қадрдонӣ карданд.

Тавре иттилоъ дода шуд, корҳои бунёдӣ дар мактаб моҳи июни соли 2015-ум оғоз гардида, он дар давоми як сол бо тарҳ ва услуби муосири меъморӣ аз ҷониби зиёда аз 140 нафар сохтмончӣ сохта ба истифода дода шуд.

Эзоҳи худро нависед



Рамзҳо дар расм