Барои дар ҷодае соҳиби мавқеи худ гардидан пеш аз ҳама дониш, малакаву маҳорат, ҳамеша дар талоши чизи нав будан ва аз ҳама муҳим иродаи мустаҳкам доштан лозим аст. Вақте инсон дорои ин хислатҳост, пас бо боварӣ метавон гуфт, ки ояндаи дурахшоне ӯро интизор аст.

Дилафрӯз Каримова, омӯзгори фанни забони англисии литсейи физикӣ-математикии №1-и шаҳри Хуҷанд аз ҳамин гуфтаҳо кор гирифта, аз рӯзҳои нахустини ба ҷодаи омӯзгорӣ қадам ниҳоданаш пайваста дар талоши он буд, то донишу таҷрибааш бештар гардаду миёни коллективи ҳамкорон ва шогирдонаш дорои ҷойгоҳи хеш бошад.

Дилафрӯз Каримова зодаи шаҳри бостонии Хуҷанд буда, соли 1982 дар оилаи хизматчӣ таваллуд шудааст. Ӯ соли 1989 ба МТМУ №23-и шаҳри Хуҷанд ба синфи аввал рафта, соли 1998 МТМУ №16-и шаҳраки Обшорони ноҳияи Бобоҷон Ғафуровро хатм намудааст. Соли 1998 пас аз хатми мактаби миёна ба факултети забонҳои хориҷии Донишгоҳи давлатии Хуҷанд ба номи академик Б.Ғафуров дохил шуда, онро соли 2003 бо дипломи аъло хатм кардааст. Дар даврони мактабхонӣ бо талошу заҳмат ва донишу маърифаташ дар озмунҳои гуногун аз фанни забони англисӣ иштирок намудаву тавонистааст, сазовори ҷойҳои ифтихорӣ гардад. Ӯ то иштирок кардан, дар озмуни ҷумҳуриявии “Омӯзгори соли Тоҷикистон – 2019” дар самти хеш ба дастовардҳои зиёди соҳавӣ ноил гардидааст. Аз ҷумла, дар шаҳри Хуҷанд дар озмунҳои аёниятҳои дастии беҳтарин ва дарси кушоди беҳтарин иштирок намудаву сазовори ҷойи аввал шудааст.

Аммо барояш иштирок дар озмуни ҷумҳуриявии “Омӯзгори соли Тоҷикистон-2019”, ки се рӯз, аз 16 то 18-уми январи соли ҷорӣ идома ёфт, хеле муҳиму хотирмон буд. Ӯ дар даври ниҳоии ин озмун, ки дар он панҷ нафар ғолибони даври вилоятию минтақавӣ ва шаҳрӣ иштирок намуданд, бо донишу маҳорат, малака ва истеъдоди худ тавонист, бо баҳогузории аъзои ҳакамон бо гирифтани 205 хол ғолиби озмуни “Омӯзгори соли Тоҷикистон-2019” гардаду бо туҳфаҳои рамзӣ, маблағ, нишони “Аълочии маориф ва илми Ҷумҳурии Тоҷикистон”, дипломи Вазорати маориф ва илм, ифтихорномаи Иттифоқи касабаи кормандони маориф ва илм қадрдонӣ шавад.

“Озмуни ҷумҳуриявии “Омӯзгори соли Тоҷикистон – 2019” озмуне буд, ки дар ҳақиқат шаффоф ва ошкоро баргузор гардид. Ин озмун, ки аз рӯи ҳашт шарт доир шуд, барои ҳар иштирокчӣ осон набуд. Дар даври ниҳоӣ, ки панҷ нафар аз вилоятҳои кишвар ва шаҳри Душанбе иштирок намудем, ҳар иштирокчӣ кӯшиш мекард, то маҳорату малакаи худро хуб истифода бараду ҷойи ифтихориро ба даст орад. Хушбахту сарфарозам, ки ғолиби озмун гардидам,” - иброз дошт Дилафрӯз Каримова.

Дилафрӯз мегӯяд, омӯзгор пеш аз ҳама бояд шахсе бошад, ки касби худро дӯст дорад: “Мо, ки ҳамеша ба таълиму тарбияи наврасону ҷавонон машғулем, бояд шогирдони худро дӯст дорем. Рисолати асили ҳар омӯзгор дар он аст, ки барои баланд бардоштани сатҳу сифати таълим ва тарбия намудани хонандагон дар руҳияи ватандӯстию ватанпарварӣ, хештаншиносию худогоҳии миллӣ ва ифтихори миллӣ ҷаҳду талош намояд,”-гуфт ӯ.

Дилафрӯз Каримова, ки худ омӯзгори фанни забони англисист, донистани забонҳои хориҷиро муҳим арзёбӣ мекунад. Ӯ гуфт: “Забономӯзӣ масъалаест, ки Президенти кишвар муҳтарам Эмомалӣ Раҳмон ҳамеша дар паёмҳои худ оид ба он таъкид менамоянд. Воқеан, донистани забони хориҷӣ дар баробари забони модарӣ, ба манфиати кор аст. Беҳуда нагуфтаанд, ки “Забон донӣ, ҷаҳон донӣ”.

Ба таъкиди ӯ, имрӯз бо шарофати сиёсати хирадмандонаи Пешвои миллат, соҳаи маориф яке аз соҳаҳои афзалиятнок ва муҳими давлатдорӣ ба ҳисоб меравад. Ҳамаи он дастовардҳое, ки то имрӯз соҳаи маорифи кишвар ба даст овардааст, натиҷаи дастгириву ғамхории пайвастаи Пешвои миллат мебошанд ва вазифаи омӯзгорон ин аст, ки бо фаъолияти назарраси хеш саҳми худро дар рушди соҳаи маорифи кишвар гузоранд.

Дар охири суҳбат, Дилафрӯз Каримова иброз дошт, ки: “Имрӯз ҷавонону наврасони мо бояд ҳамеша пайи илмомӯзӣ бошанду касбу ҳунар омӯзанд ва барои пешбурду пешрафти ватани азизамон саҳми худро гузоранд. Чунки бе омӯхтани илму дониш шахс дар самти худ муваффақ шуда наметавонад”.