2 феврал Раҳим Саидзода, вазири маориф ва илми Ҷумҳурии Тоҷикистон зимни нишасти хабарӣ бо рӯзноманигорон гуфт, истифодаи телефон ва планшетҳо дар мактабҳо иҷоза дода намешавад.

Номбурда таъкид кард, ки ба Қонуни Ҷумҳурии Тоҷикистон дар бораи маориф тағйироту иловае ворид нагардидааст ва истифодаи телефону планшетҳо қатъиян манъ аст.

- Ин масъала аз ҷониби вазорат назорат карда мешавад, - зикр кард вазир.

Қаблан, рӯзи 1-уми августи соли 2023 Раҳим Саидзода, вазири маориф ва илми Ҷумҳурии Тоҷикистон дар нишасти матбуотии вазорат иттилоъ дода буд, ки ниҳоди зери тобеаш лоиҳаи наверо омода мекунанд, ки баъди қабули он истифодаи планшетҳо ва дигар воситаҳои техникӣ барои хонандагон иҷоза дода мешавад.

“Дар чорчӯби татбиқи лоиҳаи мазкур ба Қонуни Ҷумҳурии Тоҷикистон “Дар бораи маориф” тағйирот ворид мешавад. Мутобиқи тағйирот ба қонун, хонандагон метавонанд ҳангоми дар муассисаи таълимӣ будан, аз воситаҳои техникӣ васеъ истифода баранд”, - гуфта буд вазири маориф.