Озмуни ҷумҳуриявии “Фурӯғи субҳи доноӣ китоб аст” ҷамъбаст гардида, ғолибон муайян ва қадрдонӣ шуданд. Имсол дар даври ниҳоии озмуни мазкур Умеда Шарифова, хонандаи синфи 4-и МТМУ №4-и ноҳияи Мастчоҳ дар номинатсияи “Адабиёти муосири тоҷик” ба гирифтани Шоҳҷоиза мушарраф гардид.

Баъди иштирок дар Озмуни ҷумҳуриявии “Фурӯғи субҳи доноӣ китоб аст” дар зиндагии Умеда Шарифова саҳфаи наву дурахшон боз шуд. Зеро бо роҳнамоии устодаш Одинамуҳаммад Суфии Раҷабзод ниҳоят ба гирифтани Шоҳҷоиза дастёб гардид.

Умеда дар деҳоти Мастчоҳи ноҳияи Мастчоҳ ба дунё омада, дастпарвари МТМУ №4 мебошад. Падараш саҳмдори хоҷагӣ, модараш омӯзгор аст. Волидонаш дар тарбияи фарзандон таваҷҷуҳи дучанд доранд ва ҳамин ғамхорӣ ва фароҳам овардани шароит боиси он гардид, ки Умеда ба ҳадафҳои некаш бирасад. Дар муассисае, ки таълим мегирад, омӯзгорон мегӯянд, ки Умеда бо баҳои аъло таҳсил дорад ва масъулиятшинос буда, нисбати ҳамсинфонаш ғамхору меҳрубон аст.

Умеда Шарифова имсол дар бахши “Адабиёти муосири тоҷик”-и Озмуни ҷумҳуриявии “Фурӯғ...” иштирок намуд. Ӯ дар доираи омодагӣ ба ин озмун 137 ғазал, 250 байт достон, 150 байт аз эҷодиёти халқ, 150 рубоӣ, 20 роман, 40 повест, 6 очерк, 3 асари драмавӣ, 150 ҳикоя аз бар намудаву мутолиа кардааст.

- Дар ин роҳ устодам ва волидонам ҳамеша дар паҳлуям буданд. Ба ман қувват мебахшиданд. Аз он хушҳолам, ки ба гирифтани Шоҳҷоизаи озмун мушарраф гардидам. Барои ташкили чунин озмунҳо пеш аз ҳама ба Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон самимона миннатдорӣ баён мекунам. Озмуни ҷумҳуриявии “Фурӯғи субҳи доноӣ китоб аст” зиндагии маро куллан тағйир дод. Ин ҳам бо шарофати ҳамнишинӣ бо китоб, иҷрои ҳидоятҳои омӯзгорам ва волидонам аст, - мегӯяд Умеда Шарифова.

Солҳои охир дастоварди хонандагону омӯзгорони муассисаҳои таълимии ноҳияи Мастчоҳ бештар гардида, онҳо дар озмуну олимпиадаҳои ҷумҳуриявӣ ва байналмилалӣ фаъолона иштирок менамоянд. Таҳлилҳо нишон медиҳанд, ки давоми 7 сол дар даври ниҳоии Озмуни ҷумҳуриявии “Фурӯғи субҳи доноӣ китоб аст” 13 нафар хонандагону омӯзгорони муассисаҳои таълимии ноҳияи Мастчоҳ ҳамчун ғолиб сазовори ҷойҳои 1, 2, 3 ва Шоҳҷоиза гардидаанд.

Ғолибияти хонандагони муассисаҳои таълимии ноҳияи Мастчоҳ дар ниҳоди хурду бузург муҳаббат ба китобро дучанд менамояд. Қаҳрамонии Умеда Шарифова барои дигарон намунаи ибрат дониста мешавад ва ҳар як омӯзгор ва падару модарон орзу мекунанд, ки фарзандону шогирдони онҳо ҳам ба чунин қуллаи мурод бирасанд.

Субҳиддин ҚОДИРОВ, “ҶТ”