Муассисаи давлатии “Академияи ВАО-и Тоҷикистон” дар доираи як лоиҳа тасмим гирифтааст, ки вохӯрии собиқадорони соҳаи журналистикаро бо донишҷӯёни факултаву бахшҳои рӯзноманигорӣ мунтазам доир намояд.



 Имрӯз дар доираи ҳамин лоиҳа Раҷаби Мардон, нависанда, собиқадори соҳаи телевизиону матбуот ва рӯзноманигори соҳибтаҷриба бо донишҷӯёни Донишгоҳи миллии Тоҷикистон, Донишгоҳи славянии Руссияву Тоҷикистон, Донишкадаи давлатии фарҳанг ва санъати Тоҷикистон ва Коллеҷи фарҳанги ҷумҳуриявӣ ба номи Партов Бӯйдоқов вохӯрӣ кард.

Зиннатулло Исмоилзода, раиси Академияи ВАО чорабиниро оғоз намуда, иброз дошт, ки: “Лоиҳаи “Мактаби таҷрибаҳо” ба хотири пайванди наслҳои гуногуни журналистикаи тоҷик роҳандозӣ гардидааст. Мақсади баргузории лоиҳа дар он аст, ки донишҷӯёни риштаи журналистика ва навқаламоне, ки дар ин самт таҷрибаи кофӣ надоранд, бо устодону собиқадорони соҳа вохӯрӣ ва суҳбат дошта бошанд. Дар рафти суҳбат собиқадорон аз таҷриба ва роҳи паймудаи худ ёдовар шуда, дар ин баробар ба суолҳои ҳозирин атрофи журналистикаи касбӣ ва роҳу усулҳои дар ин самт муваффақ шуданашон ҷавоб медиҳанд.”

Дар рафти чорабинӣ рӯзноманигори соҳибтаҷриба Раҷаби Мардон аз даврони навқаламии худ то ин замон ёдовар шуда, қайд намуд, ки: “Рӯзноманигорӣ касби пуршараф буда, барои ворид шудан ба он бояд софдилона фаъолият кард. Пеш аз ҳама, журналист бояд масъулиятшиносу чусту чолок ва ҳақиқатҷӯву некбин бошад. Журналист бояд аз ҳама соҳа огаҳӣ дошта, ҳамсуҳбату хонандаи худро бо маводҳои асосноку хонданӣ қонеъ карда тавонад.”

Инчунин гуфта шуд, ки тамоми шахсиятҳои барҷаста аз мактаби пуртаҷрибаи журналистӣ, хусусан аз рӯзнома фаъолияти худро оғоз намудаанд. Дар даврони соҳибистиқлолии кишвар тамоми шароитҳо барои ҷавонон фароҳам оварда шудааст ва онҳоро мебояд аз ин самаранок истифода намуда, соҳаи журналистикаро мукаммалтар намоянд.
Дар охир миёни донишҷӯён ва собиқадори соҳа муколамаи озод сурат гирифт, ки донишҷӯён ба суолҳои худ ҷавобҳои қаноатбахшу ибратомӯз гирифтанд.