МАОРИФ ВА ИЛМ
Ҷумъа 23 Октябр 2020 01:24
7269

Чанд рӯз пеш дар тамоми муассисаҳои таълимии кишвар соли нави таҳсили 2020-2021 бо баргузории Дарси сулҳ оғоз гардид. Чун анъанаи солҳои пешин Пешвои миллат муҳтарам Эмомалӣ Раҳмон дар яке аз муассисаи таълимии пойтахт дар Дарси сулҳ иштирок ва суханронӣ намуданд. Ин бори дигар аз он шаҳодат медиҳад, ки Сарвари давлат дар сиёсати иҷтимоии давлат ба соҳаи маориф афзалият медиҳанд.

Президенти Ҷумҳурии Тоҷикистон муҳтарам Эмомалӣ Раҳмон зимни ироаи Паёми худ ба Маҷлиси Олии Ҷумҳурии Тоҷикистон 26 декабри соли 2019 изҳор дошта буданд, ки соли 2020 дар Тоҷикистон сохтмони 181 муассисаи таҳсилоти умумӣ пешбинӣ шудааст. То ҷашни 30-солагии Истиқлолияти давлатии Ҷумҳурии Тоҷикистон 338 мактаб ва 128 муассисаи томактабӣ бунёд мегардад. Дар маҷмуъ 1332 муассисаи таълимӣ ва томактабии ҷумҳурӣ тармиму таҷдид карда мешавад.

Тавре аз суханронии Президенти кишвар дар оғози соли нави таҳсил аён гардид, аз 1332 мактабу муассисаҳои томактабии ба нақша гирифташуда, то моҳи августи соли 2020-ум 367 муассисаи таҳсилоти миёнаи умумӣ ва 30 кӯдакистон сохта ва ба истифода супорида шудааст, ки аз ин шумора 135 муассисаи таҳсилоти умумӣ ва 21 кӯдакистон аз ҷониби соҳибкорони ҳимматбаланду ватандӯсти кишвар бунёд гардидааст.

Дар ҷумҳурӣ танҳо дар шаш моҳи соли ҷорӣ 5 муассисаи томактабӣ ва 37 муассисаи таҳсилоти умумӣ сохта, ба истифода дода шудааст.
Президенти мамлакат зимни вохӯриву суханрониҳои хеш мудом таъкид менамоянд, ки фарзандони мо бояд илму дониш омӯзанд, соҳиби касбу ҳунар шаванд, чунки зиндагии осудаву фаъолияти самараноки онҳо дар оянда аз сулҳу оромии кишвар ва суботи сиёсии ҷомеа вобастагии зиёд дорад. Тавассути асноди расмии аз ҷониби Сарвари давлат баимзорасида, аъзои Ҳукумат, роҳбарони кумитаҳо, хадамоту агентиҳо, дигар сохтору мақомоти давлатӣ ва ташкилоту муассисаҳо, сарфи назар аз шакли моликияти онҳо вазифадор гардидаанд, ки дар тамоми шаҳру ноҳияҳо, махсусан дар деҳаҳои дурдаст барои бунёди иншооти таъиноти иҷтимоӣ, аз қабили муассисаҳои соҳаи маориф, тандурустӣ, фарҳанг, варзиш ва соҳаҳои хизматрасонӣ якҷо бо соҳибкорону тоҷирон ва сокинони маҳалҳо тадбирҳои мушаххас андешанд.

Бояд зикр намуд, ки давлат ва Ҳукумати Тоҷикистон ҳамаи захираву имкониятҳоро ҷиҳати фароҳам овардани шароити мусоид барои зиндагиву таҳсили наврасону ҷавонон, яъне насли ояндасози миллат сафарбар кардааст.

“Мактаб ҳамчун даргоҳи муқаддас барои ташаккули шахсият дар ҷомеа ва мавқеи устувор пайдо кардани ӯ нақши асосиву ҳалкунанда дорад. Фаромӯш набояд кард, ки ҳар шахс ба ҳар мақому мартабае, ки расида бошад, донишҳои аввалинро аз мактаб ва омӯзгор гирифтааст. Илова ба корҳое, ки давлат дар самти рушди соҳаи маориф то имрӯз анҷом додааст, ман борҳо шахсонеро, ки шароити хуби молиявӣ доранд, даъват кардам, ки дар зодгоҳи худ муассисаи таълимие бунёд намоянд ё аз рӯи имконият барои таъмири мактабе, ки дар он таҳсил кардаанд, кумаку мусоидати худро дареғ надоранд”, - таъкид намудаанд Сарвари давлат.

Дар робита ба ин даъвати Президенти кишвар аз ҷониби соҳибкори ватанӣ Абдухалил Ғуломов дар ноҳияи Фирдавсии шаҳри Душанбе сохтмони мактаб барои 2400 ҷойи нишаст дар як баст ба маблағи беш аз 35 миллион сомонӣ оғоз шуд. Аз ҷониби ҳамин соҳибкор як сол қабл дар деҳаи Шаҳристони ноҳияи Рӯдакӣ бинои замонавии муассисаи таҳсилоти миёнаи умумӣ барои 1280 хонанда бо харҷи 21 миллион сомонӣ сохта, ба истифода дода шуд. Ҳамчунин аз ҷониби ин соҳибкор дар шаҳри Кӯлоб бинои муассисаи таҳсилоти миёнаи умумӣ ба маблағи 35 миллион сомонӣ барои 2500 ҷойи нишаст бунёд шуда истодааст, ки соли 2021 дар арафаи таҷлили 30-солагии Истиқлолияти давлатӣ ба истифода дода мешавад. Албатта, дар ду-се сол барои 6200 толибилм ҷойи таҳсилу шароити сатҳи баланд муҳайё кардани як соҳибкор лоиқи таҳсину офарин аст.

Дар ин самт фаъолияти роҳбарони ширкатҳои истеҳсолӣ низ назаррас аст. Аз ҷониби ширкати “Чунгтсай Моҳир семент” дар ноҳияи Синои шаҳри Душанбе сохтмони мактаб барои 2400 ҷойи нишаст ба маблағи 45 миллион сомонӣ оғоз карда шуда, дар арафаи таҷлили 30-солагии Истиқлолияти давлатӣ мавриди баҳрабардорӣ қарор дода мешавад. Ширкати мазкур соли 2016 дар деҳоти Даҳанаи ноҳияи Ёвон мактаби таҳсилоти умумиро барои 640 хонанда ба маблағи 13 миллион сомонӣ сохта ба истифода додааст. Ин ширкат дар маҷмуъ 1000 ҷойи кории доимӣ муҳайё кардааст.

Пешвои миллат зимни суханронии худ бахшида ба оғози соли нави таҳсил ба ҳама мардуми кишвар, аз ҷумла ба соҳибкорони ватаниву бурунмарзӣ ва дигар шахсони ҳимматбаланд, ки дар амалӣ шудани Амри Роҳбари давлат дар бунёду таҷдиди роҳу пулҳо ва иншооти иҷтимоӣ, аз ҷумла муассисаҳои маориф ва фарҳангу тандурустӣ, коргоҳу корхонаҳои истеҳсолӣ, хатҳои обрасонӣ ва дигар корҳои хайр саҳми ватандӯстона гузошта истодаанд, миннатдории самимӣ изҳор намуданд.

Мардуми заҳматқарини мо, аз ҷумла кормандони соҳаи маорифро зарур аст, ки ҷавобан ба чунин дастгириҳои давлат ва афроди ватандӯст сатҳу сифати таълимро дар ҳар як муассисаи таълимӣ баланд бардоранд. Инчунин назорати азхудкунии донишҳои замонавиро пурзӯр гардонида, наврасону ҷавононро ба мутолиаи китобҳои бадеию илмӣ ташвиқ намоянд ва ба таълими фанҳои табиатшиносӣ, дақиқ ва риёзӣ таваҷҷуҳи бештар зоҳир намоянд.

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
28 29 30 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31 1

Октябр 2020 c.