Шумораи умумии довталабони дар ҳамаи давраҳо ба қайд гирифта (84 628 нафар) нисбат ба шумораи умумии ҷойҳои тибқи нақшаи қабули донишҷӯён дар соли 2016 ҷудогардида (54 827) 29 801 нафар зиёд буд.

Сабзалӣ Ҷаъфаров, муовини якуми директори Маркази миллии тестӣ, зимни нишасти хабарӣ иттилоъ дод, ки шумораи умумии довталабони ба озмуни тақсимот дар имтиҳонҳои марказонидаи дохилшавӣ (ИМД) роҳёфта, яъне холҳои гузаришро аз субтестҳо (фанҳо)-и дахлдор бадастоварда, 59 260 нафарро ташкил дод.

Ба таъкиди номбурда, мувофиқи маълумоти омории натиҷаҳои озмуни тақсимоти асосӣ аз шумораи умумии довталабон 43 807 нафарашон муваффақ гардида, аз рӯйи ихтисосҳои интихобкардаашон ба муассисаҳои таълимӣ тақсимот гардиданд.

Тибқи иттилои масъулини ММТ, шумораи умумии довталабони тибқи нақшае, ки ба муассисаҳои олии кишвар дохил шаванд, 54 827 ҷой аст ва аз ин 39 172 ҷой шартномавӣ ва 15 655 ҷой буҷавӣ мебошад. Пас аз тақсимот маълум гардид, ки 29 229 нафар тариқи шартномавӣ ва 14 578 нафар буҷавӣ ба муассисаҳои олӣ тақсим шуданд.