Хуршед Икромӣ, директори Маркази милии тестии назди Президенти Ҷумҳурии Тоҷикистон 24 январ дар нишасти матбуотӣ ба хабарнигорон гуфт: “Бо супориши Асосгузори сулҳу ваҳдати миллӣ - Пешвои миллат, муҳтарам Эмомалӣ Раҳмон соли 2018 аз довталабон ба ҷои иншо эссе (кори хаттӣ) гирифта мешавад”.

Ӯ иброз дошт, ки ин иқдом дар асоси омӯзиши таҷрибаи давлатҳои пешрафта роҳандозӣ шуда, ҳадаф аз он фаҳмидани андешаи довталаб, бо забони адабии тоҷикӣ ва беғалат баён карда тавонистани фикр мебошад.

- Бартарияти эссе дар он аст, ки зимни навиштани он довталаб аз такрори зиёди маънӣ, дароз кардани сухан, овардани сухан ва далелҳои беҳуда, ки ба мавзуъ мувофиқ нестанд, худорӣ намояд. Ҳамчунин, солҳои пеш иншои навишати довталабон 5–6 саҳифаро дар бар мегирифт, ки тафтиши он душвориҳоро ба миён меовард. Аз ин хотир тасмим гирифтем, ки баҳри рафъи ин душворӣ ба низоми имтиҳонҳои марказонидаи тестӣ кори хаттӣ ё ин ки эссеро ҷорӣ кунем. Эссе дар ҳаҷми хурд навишта шуда, дар он фикр мухтасар бо далел навишта мешавад,- афзуд Х. Икромӣ

Маркази милии тестӣ барои ҷорӣ кардани эссе миёни хонандагони синфи 11-и 33 муассисаҳои таълимии таҳсилоти миёнаи умумии шаҳру ноҳияи ҷумҳурӣ озмоиш гузаронидааст. Дар озмоиш 8278 хонанда дар мавзӯҳои аз ҷониби Вазорати маориф ва илм пешниҳодшуда эссе навиштанд.