МАОРИФ ВА ИЛМ
Якшанбе 16 Июн 2019 04:41
5547
Зан – модар. Зери мафҳуми мазкур нафаре ниҳон аст, ки бо вафодориву раҳмдилӣ, садоқатмандӣ ва меҳру муҳаббати самимӣ дунёи моро накҳати тозае мебахшаду чун офтоби дурахшон ба рӯҳу равони мо нуру зиё ҳадя месозад.

Баробари оне, ки бонувон ба парваришу тарбияи фарзанд машғуланд, инчунин ба омӯхтани илму дониш ва соҳибкасб гардидан, дар соҳаҳои гуногун кору фаъолият намуда, саҳми худро дар рушди мамлакат гузошта истодаанд.

Имрӯз дар соҳаи маориф чун соҳаи калидӣ ва пояи асосии дигар соҳаҳо бонувон бомуваффақият фаъолият намуда, дар ин ҷода дастовардҳои назаррас низ доранд. Дилбар Шоева, омӯзгори фанни таърихи Гимназияи №74-и шаҳри Душанбе яке аз онҳост.

Ӯ соли 2008 пас аз хатми Донишгоҳи миллии Тоҷикистон фаъолияти омӯзгории худро нахуст дар МТМУ №39-и ноҳияи Фархор оғоз намуда, ду сол дар ин даргоҳ фаъолият кардааст. Ӯ аз соли 2010 инҷониб, дар Гимназияи №74 фаъолияти омӯзгорӣ карда, тӯли 9 соли фаъолият дар муассисаи мазкур дорандаи тахассуси дараҷаи олӣ гардидаву хонандагонро илму дониш омӯхта истодааст.

Муваффақиятҳои Дилбар Шоева дар соҳаи маориф ин сазовор гардидан бо унвони “Аълочии маорифи Ҷумҳурии Тоҷикистон” соли 2018 ва ғолиб гардиданаш дар озмуни ҷумҳуриявии “Омӯзгори сол - 2018” мебошад. Ӯ “Омӯзгори сол” эътироф гардидани худро натиҷаи заҳматҳои пайвастааш медонад: “Озмуни “Омӯзгори сол” хуб гузашт ва дар он аз тамоми шаҳру ноҳияҳои кишвар омӯзгорон иштирок намуданд. Дар даври ниҳоӣ мо панҷ нафар будем ва аз рӯи ҳафт шарти озмун миёни ҳам сабқат намудем. Хеле хушбахтам, ки аз тамоми шартҳои озмун гузаштам ва аз ҷониби ҳайати ҳакамон дар соли 2018 ғолиби озмуни ҷумҳуриявии “Омӯзгори сол” гардидам. Омӯзгори сол гардидан, бешубҳа орзуи ҳар омӯзгор аст ва ифтихор аз он мекунам, ки омӯзгори сол гардидам”.

Чи гуна касб будани пешаи омӯзгориро чунин шарҳ дод: “Омӯзгорӣ касби пурифтихор аст. Ин роҳ на танҳо касб, балки меҳру муҳаббат ва ишқ варзидан ба ин касб мебошад. Яъне агар хонандагони худро дӯст надоред, наметавонед, ки омӯзгор бошед. Чуноне бузургон дар ин росто гуфтаанд:

Муаллимро набошад хоб то рӯз,

Набошад мисли ӯ дар кор дилсӯз.

Омӯзгорӣ касбест, ки бояд ватанро дӯст дошт, кӯдакро дӯст дошт ва дар сиришти ӯ хештаншиносиро омӯзонид. Тавре бояд хонандагонро таълим дод ва онҳоро водор сохт, ки дар ҷомеаи имрӯза онҳо лозиманд ва метавонанд, ки саҳми худро дар пешрафти ин ҷомеа гузоранд. Албатта, дар ҳар синф хонандагоне ҳастанд, ки дониши миёна доранд. Мо, омӯзгорон бояд онҳоро аз ҳам ҷудо накунем, балки кӯшиш намоем, ки онҳо низ шавқманд шаванду дар қатори дигарон пешсаф бошанд”.

“Омӯзгор вақте аз омӯхтан бозмонд, ӯ дигар омӯзгор нест, - иброз медорад Дилбар Шоева. – Омӯзгор бояд ҳамеша ҷӯянда бошад, навоварӣ намояд ва аз болои худ кор кунад. Омӯзгори имрӯза бояд аз шабакаи ҷаҳонии интернет истифода намояд, намунаҳои дарсҳоро бубинад ва дар фаъолияти худ аз онҳо истифода барад. Ман ҳамеша аз маводҳои муассиса, ҳам омӯзгорони ҷумҳурӣ ва ҳам аз донишгоҳҳо истифода мебарам. Инчунин, бо омӯзгорони хориҷӣ тавассути сайтҳои моҳворавии “мултиурок” ва “инфоурок” ҳамкорӣ дорам. Аз ин сайтҳо барои такмили касбиятам истифода мекунам. Омӯзгор бояд ҳамқадами замон бошад. Зеро хонандаи имрӯз хеле серталаб аст ва омӯзгор бояд ба тамоми пурсишҳои ӯ посухҳои мушаххас дода тавонад. Доимо талош менамоям, ки ба шогирдонам мувофиқи ихтисоси худ донишҳои навро омӯзонам”.

Ӯ сирри муваффақияти омӯзгории худро дар оилаи омӯзгор ба дунё омадану дар муҳити он бузург шудан медонад. Ҳамин гуна муҳити хуби омӯзгорӣ боис гардид, ки аз хурдӣ ишқи ҳақиқии пешаи омӯзгориро дар қалбаш ҷо намуд ва имрӯз сарбаландона фаъолият дораду саҳми худро дар рушди маорифи кишвар гузоштаистодааст.

“Имрӯз бонувон баробари мардон дар дилхоҳ соҳа кору фаъолият доранд, бахусус дар соҳаи маориф. Шумораи бонувони омӯзгор дар соҳаи маориф хеле зиёданд ва фаъолияти назаррас доранд. Нақши онҳо дар таълиму тарбияи насли наврас бениҳоят муҳим аст. Зеро ӯ модар асту ғамхор. Дар раванди таълим нисбат ба ҳар хонанда ғамхории худро изҳор карда метавонад. Ӯ ҳамчун омӯзгор метавонад, барои омӯзиш ва баланд гардидани дониши хонандагон саҳми арзанда дошта бошад. Дар гимназия, ки фаъолият менамоям, аз шумораи умумии омӯзгорон 97 нафарашон бонувон мебошанд ва муваффақиятҳои онҳо назаррасанд. Аз ин рӯ, нақши бонувони омӯзгор дар рушди соҳаи маориф баръало мушоҳида мешавад”, - афзуд Д. Шоева.

Ба назари ӯ Ҳукумати кишвар ба соҳаи маориф таваҷҷуҳи зиёд дорад. Маҳз сиёсати маорифпарваронаи Президенти кишвар муҳтарам Эмомалӣ Раҳмон аст, ки имрӯз дар тамоми минтақаҳои ҷумҳурӣ муассисаҳои таълимии наву замонавӣ сохта ба истифода дода шуда, ҷиҳати илмомӯзии наврасону ҷавонон тамоми шароитҳои зарурӣ фароҳам оварда шудааст.

Дар интиҳои суҳбат доир ба таваҷҷуҳи хонандагон ҷиҳати илмомӯзӣ ва чи гуна сипарӣ намудани айёми ҷавонӣ Дилбар чунин гуфт:

“Имрӯз таваҷҷуҳи наврасон нисбат ба донишомӯзӣ хуб аст. Дар муассисае, ки кору фаъолият дорам, мушоҳида менамоям, ки хонандаҳо ҳамеша пайи аз бар намудани илму донишанд ва хонандагони синфҳои болоӣ баробари машғулиятҳои муассиса, инчунин бо маркази рушди истеъдодҳо ҳамкорӣ доранд ва пайи омӯзиши забонҳои хориҷианд. Ҳамчун омӯзгор ба ҷавонон гуфтаниям, ки вақти пурқимати худро ба омӯзиш сарф намоянд. Зеро омӯзиш ба баланд гардидани дониш ва васеъ гардидани ҷаҳонбинии онҳо саҳми беандоза мегузорад”.


Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
27 28 29 30 31 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30

Июн 2019 c.