Бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва ташкилоти ҷамъиятии “Пайравони Пешвои миллат” дар толори Донишгоҳи давлатии омӯзгории Тоҷикистон ба номи Садриддин Айнӣ аз ҷониби маҳфили доимоамалкунандаи ““Тоҷикон” – оинаи таърихи миллат” ҳамоиши илмӣ-назариявӣ таҳти унвони “Аҳамият ва моҳияти озмуни ““Тоҷикон”-оинаи таърихи миллат” дар ташаккули худшиносӣ ва худогоҳии миллии ҷавонон” баргузор гардид.

Дар ҳамоиши мазкур Сураҷ Чоршанбезода, муовини раиси КҶВ, Зарнигор Раҷабзода, муовини раиси ташкилоти ҷамъиятии “Пайравони Пешвои миллат”, роҳбарият ва омӯзгорону донишҷӯёни Донишгоҳ иштирок ва суханронӣ намуданд.

Зимни баргузории ҳамоиш Сураҷ Чоршанбезода таъкид намуд, ки ин иқдоми наҷиб, ки бевосита аз ҷониби Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон гирифта шудааст, басо иқдоми саривақтӣ буда, барои боло бурдани ҳиси худшиносии аҳли ҷомеа, махсусан ҷавонон нақши босазо мегузорад.

Сипас, профессор Зикриё Акрамӣ ба сухан баромада, вобаста ба аҳамият ва нақши озмуни ҷумҳуриявии ““Тоҷикон” – оинаи таърихи миллат” дар ташаккули худшиносӣ ва худогоҳии миллии ҷавонон ибрози ақида намуд.

Гуфта шуд, ки омӯзиши таърих яке аз василаҳои асосии ташаккули худшиносӣ ва худогоҳии миллист. Таърих тамоми марҳилахои сипаришудаи ниёгони халқро мавриди инъикос қарор дода, барои насли имрӯз дасри ибрат аст.

Дар қисмати хотимавӣ аз ҷониби Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба иштирокчиёни ҳамоиш Сипоснома тақдим гардид.