Дирӯз бо иштироки намояндагони Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, Вазорати маориф ва илм, сафоратхонаҳои хориҷӣ дар Донишгоҳи давлатии тиббии Тоҷикистон ба номи Абӯалӣ ибни Сино “Рӯзи хатм” баргузор гардид.

Гулзода Маҳмадшоҳ Қурбоналӣ, ректори донишгоҳ, зимни ифтитоҳи чорабинӣ тамоми донишҷӯёни хатмкунандаро, ки сазовори номи пуршарафи табиб гаштаанд, табрик гуфта, барояшон барору комёбӣ тамано намуд. 

Номбурда дар идомаи баромади хеш таъкид намуд, “Айни ҳол дар донишгоҳ 11 ҳазору 500 нафар донишҷӯ, аз ҷумла 1400 нафар донишҷӯёни хориҷӣ аз 16 мамлакати дунё таҳсил мекунанд. Имсол аз донишгоҳ 1556 нафар донишҷӯйро, ки аз ин 454 нафар буҷавӣ, 889 нафар шартномавӣ ва 213 нафарашон тибқи квотаи Президентӣ таҳсил мекарданд, ба хизмати халқу Ватан сафарбар менамоем. Аз ин шумора 65 нафарашон донишгоҳро бо дипломи аъло намуданд. Боиси ифтихор аст, ки миёни хатмкунандагон 123 нафараш донишҷӯёни хориҷӣ аз 7 давлати дунё, аз ҷумла Ҷумҳурии Ҳиндустон 90 нафар, аз Ҷумҳурии Исломии Афғонистон 10 нафар, Қазоқистон 10 нафар, Қирғизистон 5 нафар, аз Федератсияи Русия 1 нафар донишгоҳро бо сари баланд хатм намуданд”.

Дар интиҳои чорабинӣ барномаи фарҳангӣ пешкаши ҳозирин гардонида шуд.