Дар Ҷумҳурии Тоҷикистон норасоии омӯзгорон дар соҳаи маорифи кишвар то ба ҳол масъалаи нигаронкунанда боқӣ мондааст.

Дар ин бора имрӯз Раҳим Саидзода, вазири маориф ва илми кишвар зимни нишасти матбуотии ниҳоди зери идорааш хабар дод.

Дар нишаст гуфта шуд, ки масъалаи муҳими соҳа, боқӣ мондани норасоии омӯзгорон ва фаъолияти омӯзгорони ғайриихтисос мебошад.

Ҳамзамон зикр гардид, ки дар нимсолаи якуми соли 2024 норасоии омӯзгорон ба 2670 нафар мерасад.

- Тибқи Низомномаи намунавии муассисаҳои таҳсилоти умумии Тоҷикистон, ки бо қарори Ҳукумати ҶТ аз 28 марти соли 2024 қабул гардидааст,бо мақсади бартараф кардани норасоӣ 2170 нафар донишҷӯ дар мувофиқа бо Ҳукумати Ҷумҳурии Тоҷикистон ба муассисаҳои таълимӣ сафарбар карда шуданд, ки ҳамаи онҳо ба ҷойи кори муваққатӣ ҳозир шуданд, - иброз дошт Раҳим Саидзода.

Ҳамчунин вазири маориф ва илми кишвар гуфт, ки “тибқи дархости раёсату шуъбаҳои мариифи шаҳру ноҳияҳо эҳтиёҷот ба кадрҳои омӯзгорӣ 4301 нафарро ташкил медиҳад, ки нисбат ба соли 2023 46 нафар кам мебошад.

Ӯ илова кард, имсол 13 ҳазор донишҷӯ равияи омӯзгориро хатм мекунанд ва 620 нафари онҳо тибқи Квотаи президентӣ таҳсил карда истодаанд ва ҳамаи онҳо ба кор ҷалб хоҳанд шуд.

Вазир инчунин зикр кард, ки норасоии омӯзгорон дар тамоми ҷаҳон ба назар мерасад ва ин танҳо мушкили Тоҷикистон нест.