Бо дастгирии Мақомоти иҷроияи ҳокимияти давлатии шаҳри Душанбе аз ҷониби Муассисаи давлатии “Маркази рушди истеъдодҳои назди Сарраёсати маорифи шаҳри Душанбе” рӯзҳои 15 ва 16 январи соли ҷорӣ олимпиадаи даставии “Истеъдод” бахшида ба эълон гардидани солҳои 2020-2040 “Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф” ташкил ва баргузор гардида истодааст.

Бино бар иттилои Нигора Нурматова, муовини директори Маркази рушди истеъдодҳо, ҳадаф аз ташкил ва баргузории олимпиадаи мазкур ин ҳавасманд намудани хонандагон барои омӯзиши амиқи фанҳои дақиқ ва дарёфту рушди қобилиятҳои онҳо, дар байни хонандагон тарғиб ва паҳн намудани донишҳои илмӣ – амалӣ аз фанҳои табиӣ – риёзӣ, дарёфти хонандагони болаёқат ва рушди қобилияти зеҳнӣ ва эҷодии онҳо, инчунин ташвиқи хонандагони боистеъдод ба корҳои илмӣ, таҳқиқотӣ ва мусоидат намудан ба онҳо дар интихоби бошууронаи касб дар зинаҳои минбаъдаи таҳсилот мебошад.

Гуфта мешавад, олимпиадаи даставии “Истеъдод” таҷрибаи нахустин дар ҷумҳурӣ мебошад. Дар олимпиада 48 нафар хонандагони синфҳои 7-11 муассисаҳои таълимии шаҳри Душанбе иштирок менамоянд. Ҳар як иштирокчӣ аз 6 фан (математика, физика, химия, биология, технологияи иттилоотӣ ва география) ширкат меварзад.

Ғолибони олимпиадаи “Истеъдод” дар маросими ҷоизасупории ғолибони даври сеюми (шаҳрӣ) олимпиадаҳои фаннии хонандагони муассисаҳои таълимии шаҳри Душанбе қадрдонӣ карда мешаванд.