Паёми имсолаи Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмонро ба Маҷлиси Олии Ҷумҳурии Тоҷикистон аҳли Донишкадаи тарбияи ҷисмонии Тоҷикистон ба номи С. Раҳимов чун дигар сокинони кишвар бо як руҳбаландии хосса қабул намуданд. Паём чун роҳнамо вазифаҳои муассисаро барои минбаъда муайян намуд. Кормандони Донишкада, ки дар кишвар манбаи асосии омода намудани мутахассисони риштаи варзиш ба шумор меравад, дар навбати аввал нуктаҳои Паёмро дар самти маориф, ҷавонон ва варзиш ҳамчун дастури амал қарор додаанд.

Яке аз нуктаҳои муҳими Паёми имсола рушди илму маориф ва дар ин замина муҳимияти фаъолияти омӯзгор, худомӯзиву кофтуковҳои эҷодии ӯ буд. Ҳамин аст, ки дастрасӣ ба таҳсилотро Пешвои миллат яке аз нишондиҳандаҳои рушди нерӯи инсонӣ маънидод намуданд. Дарвоқеъ, танҳо миллати босавод метавонад, ки насли соҳибмаърифату донишманд ва мутахассисони арзандаи давронро ба воя расонад.

Мувофиқи назарсанҷии созмонҳои бонуфузи ҷаҳонӣ соли 2017 Тоҷикистон аз рӯи 4 нишондиҳанда, аз ҷумла дастрасӣ ба таҳсилот, сифати таҳсил, сармояи инсонӣ ва қобилияти рақобати он дар миёни 101 давлати ҷаҳон ҷои 54-ум ва миёни кишварҳои узви Иттиҳоди Давлатҳои Мустақил яке аз ҷойҳои аввалинро ишғол намуд. Вале тавре Пешвои муаззами миллат дар Паёмашон зикр намуданд: “...албатта, ин дастоварди хуб аст, аммо мо набояд бо ин нишондиҳанда қонеъ шуда, таваҷҷуҳро ба ин соҳаи ҳаётан муҳим кам намоем. Баръакс, моро зарур аст, ки боз ҳам зиёдтар заҳмат кашида, ба масъалаи таълиму тарбия афзалияти бештар диҳем, сатҳу сифати таълимро дар ҳамаи зинаҳо беҳтар кунем, барои таҳсилоти босифат аз тамоми имконот истифода карда, заминаҳои моддиву техникии муассисаҳои таълимиро таҳким бахшем ва самарабахшии фаъолияти онҳоро таъмин намоем”.

Бо дарки ин нукта имрӯз устодону кормандони Донишкада аз таваҷҷуҳу муносибати Пешвои миллат нисбат ба соҳаи маориф руҳбаланд гашта, дар роҳи таълиму тарбия рисолати хешро иҷро намуда истодаанд.

Ҳамчунин, Роҳбари давлат дар Паёми имсолаашон ба соҳаи варзиш таваҷҷуҳи махсус зоҳир намуда, дурнамои ин соҳаро бо вазифагузориҳои мушаххас дар назди масъулон пешбинӣ намуданд. Таъкид гардид, ки ҳарчанд дар шаҳру ноҳияҳои мамлакат аз соли 2011 то 2016 беш аз 1400 иншооти варзишии нав бунёд гардида, қариб 1100 иншоот таъмиру таҷдид шуда бошад ҳам, вале дар самти бунёди майдону толорҳои варзишии наву замонавӣ ва рушди минбаъдаи соҳа боз ҳам корҳои зиёдеро ба сомон расонидан зарур аст.

Имрӯз дар самти варзиш шоҳиди бунёди иншооти замонавии варзишӣ, дастгирии пайвастаи варзишгарон, фароҳам овардани шароитҳои зарурӣ барои рушди варзиш дар саросари кишвар гашта истодаем. Вале дар ин самт боз ҳам иҷрои тадбирҳои зиёди дигар - афзун намудани варзишгарони касбӣ, ҷалби бештари сокинон, бахусус насли наврас ба варзиш, оммавигардонии варзиш миёни сокинон ва дар ин замина тарбияи насли солим аз вазифаҳои муҳим маҳсуб меёбанд. Зеро маҳз варзиш яке аз беҳтарин воситаи муаррифии давлату миллат дар арсаи байналмилалӣ унвон гирифтааст.

Пешвои миллат вобаста ба сиёсати давлатии ҷавонон зикр намуданд, ки “Ғамхории Ҳукумат нисбат ба ҷавонон танҳо бо “Соли ҷавонон” маҳдуд намешавад. Баръакс, ҳалли масъалаҳои вобаста ба наврасону ҷавонон минбаъд низ самти муҳимтарини фаъолияти мо хоҳад буд”. Воқеан, тавре ҳамагон шоҳид будем, дар доираи “Соли ҷавонон” тадбирҳои хеле зиёд дар саросари кишвар роҳандозиву амалӣ гаштанд, ки ин таваҷҷуҳу ғамхориҳои пайвастаи давлату Ҳукумат аз насли ҷавон масъулияти баланди илмомӯзиву созандагӣ, ташаббускориҳои бевосита, муҳимтар аз ҳама, зиракии сиёсиро талаб менамояд.

Хулоса, ҳама масъалаҳое, ки дар Паёми имсолаи Пешвои миллат, муҳтарам Эмомалӣ Раҳмон ба Маҷлиси Олии кишвар иброз гардиданд, хеле муҳиму бамаврид буда, ҳалли мушкилоти ҷойдошта ҷиҳати расидан ба зиндагии шоиста мусоидат мекунад.

Дилором КАРИМОВА, ноиби аввали ректори ДТҶТ ба номи С. Раҳимов, номзади илмҳои педагогӣ