Солҳои мактабхонӣ мухлиси футбол будам. Аз ин рӯ ҳар шумораи рӯзномаи “Комсомоли Тоҷикистон” (ҳоло “Ҷавонони Тоҷикистон”) - ро мехондам, то ки дар бораи бозии тими дӯстдоштаам – “Помир” (Душанбе) маълумот гирам. Дар баробари ин мақолаҳои зери рубрикаҳои ба ҳаёти ҷавонон бахшидашуда ва саҳифаҳои адабии рӯзномаро низ мутолиа мекардам. Бо ҳамин мухлиси ин рӯзномаи ҷолибу ханданибоб шудам. Вале ҳеҷ тасаввур намекардам, ки рӯзе ман корманди он мешавам.

Овони донишҷӯӣ чанд мақолаам дар хусуси фаъолияти бригадаҳои пахтакорону коргарҷавонон, клуби дустӣ- интернатсионалии Донишкадаи кишоварзии Тоҷикистон, ҳифзи муҳити зист, мушкилоти нақлиёти шаҳрӣ ва ғайра дар рӯзномаи “Комсомоли Тоҷикистон” чоп шуд. Ҳамин тавр ҳамкории ман бо ин рӯзномаи дӯстдоштанӣ миёнаҳои солҳои ҳаштодуми асри гузашта оғоз ёфт.

Моҳи июни соли 2006 Самариддин Асоев сардабири рӯзномаи “Ҷавонони Тоҷикистон” таъин шуду маро, ки он вақт дар ҳафтаномаи “Чархи гардун” фаъолият доштам, ба кор даъват кард.

Он солҳо нашрияи ҷавонони ҷумҳурӣ дар хаҷми 8 саҳифа моҳе ду бор нашр мешуд. Баъди сардабир шудани Самариддин дар оғоз “Ҷавонони Тоҷикистон” ҳар ҳафта аз чоп мебаромадагӣ шуд. Сипас, шумораи сафҳаҳояш ба 16 расид. Теъдоди нашри ҳафтанома низ зиёд гашт. Ин чанд сабаб дошт. Пеш аз ҳама сардабири ҷавон, ки худ ҷӯяндаю ташаббускор буд, рӯзноманигорони сермаҳсул, ба монанди Мирзо Рустамзода, Раҳими Рафеъзод, Умаралии Сафаралӣ, Маҳмудҷон Усмонов, Муҳаммадиқбол Атоев, Наврӯз Қурбонзода ва дигаронро ба кор ҷалб намуд. Дар натиҷа муҳтавои ҳафтанома бою рангин гашт. Аз гӯшаю канори ҷумҳурӣ ба идораи рӯзнома ашхоси дорои касбу кор ва синну соли гуногун мактуб навишта, доир ба матолиби чопшуда, андешаҳояшонро баён мекарданд. Қариб дар ҳар шумора зери рубрикаҳои “Проблема ва мулоҳиза”, “Бонги изтироб”, “Доғи рӯз”, “Омӯхтан хуб аст” матолиби проблемавӣ нашр мешуд. Аз ин рӯ вазорату кумита ва сохторҳои гуногун ба мақолаҳои танқидӣ ва пешниҳодҳои ҷолиб сари вақт ҷавоб менавиштанд.

Дар давоми фаъолиятам дар ин нашрияи бонуфуз дар якчанд озмунҳои ҷумҳуриявӣ, аз ҷумла дар мавзӯъҳои ҳифзи муҳити зист, мубориза бар зидди бемории сил, “Роҳи бехатар”, ҳифзи қабати озон, тағйирёбии иқлим ва ғайра ширкат варзида, ғолиб омадаам. Бо супориши сардабир бо як қатор сафирони кишварҳои ба мо дӯст мусоҳиб шуда, дар хусуси робитаҳои дуҷониба матолиб омода мекардем. Дар гӯшаи «Сайри олам» бошад, дар хусуси мавзеъҳои дидании мамолики гуногун, таҷрибаи пешқадами кишварҳои мутараққӣ ва сабабҳои рушди соҳаи сайёҳӣ дар онҳо силсилаи мақолаҳо таҳия намудем, ки писанди хонандагону масъулони соҳа гардида буд. Махсусан собиқ муовини раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Лочин Файзуллоев, ки дар рушди соҳаи сайёҳии мамлакат хизмати арзанда кардааст, чопи ин гуна мақолаҳоро ҷонибдорӣ намуда, ҳар як идеяи навро қабул мекард. Маҳз бо мусоидати ӯ ман бо коршиносони байналмилалии соҳаи туризм Шайх Раҳматуллоҳ (Ҳиндустон), Алӣ Шер (Малайзия) ва Дабири кулли Созмони Ҷаҳонии Туристӣ Толиб Рифоӣ мусоҳиб шудам.

Тайи 9 соли сардабирӣ Самариддин Асоев ҳафтаномаи “Ҷавонони Тоҷикистон”- ро ба як коллективи аҳлу тифоқ ва мактаби таҷрибаи пешқадаму намунавӣ табдил дод. Рӯзноманигорони нисбатан таҷрибадор, ба монанди Толибшоҳ Давлат, Эмоми Назариён, Ашраф Одинамадов, Мирзо Рустамзода, Нуруллоҳи Ориф ба рӯзноманигорони ҷавон таҷрибаю малакаи худро ёд медоданд. Ҳар сол гурӯҳи калони донишҷӯёни факултаи рӯзноманигории ДМТ давраи таҷрибаомӯзиашонро дар идораи “Ҷавонони Тоҷикистон” мегузарониданд. Бо мақсади ҷалбу ҳавасмандкунии донишҷӯён дар ҳафтанома саҳифаи махсус таъсис дода шуд.

Ман моҳи апрели соли 2016 ба рӯзномаи “Садои мардум” ба кор гузашта бошам ҳам, то ҳол аз “Ҷавонони Тоҷикистон” ҷудо нестам. Ҳар шумораи онро бошавқ мутолиа мекунам. Хушҳолам, ки имрӯз ороишу муҳтавои нашрия хеле ҷолиб гашта, анъанаи неки пешиниён риоя мегардад. Бо сарварии рӯзноманигори хушсалиқа Шодихони Назар дар ҳафтанома эҷодкорони сертакопӯ ҷамъ омада, баҳри ояндаи неки кишвар заҳмат мекашанд.

90- солагии “Ҷавонони Тоҷикистон”- ро, ки умре сабақомӯзи ҷавонони кишвар аст, ба аҳли ҳафтанома ва хонандагони сершумори он муборакбод гуфта, таманнои онро дорам, ки ҳамагон бо тани сиҳату хотири болида шоҳиди таҷлили 100- солагии он шавем.

Сайфиддин Суннатӣ,
хабарнигори рӯзномаи
“Ҷавонони Тоҷикистон” (2006-2016)