Дар пайравӣ аз сиёсати маорифпарваронаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон Вазорати маориф ва илми кишвар дар ҳамкорӣ бо Маркази миллии тестии назди Президенти Ҷумҳурии Тоҷикистон имтиҳонҳои озмоишӣ бо иштироки хатмкунандагони муассисаҳои таълимии шаҳру ноҳияҳои ҷумҳурӣ гузаронид. Бо мақсади огаҳӣ пайдо намудан аз рафти баргузории ин чорабиниҳо, ҳадафу интизориҳо бо чанд суол ба Парвиз Саидзода, сардори раёсати ташкил ва идораи имтиҳон, робита бо ҷомеа ва таъминоти иттилооти Маркази миллии тестии назди Президенти Ҷумҳурии Тоҷикистон муроҷиат намудем.

- Мегуфтед, ки мақсад аз роҳандозии ин иқдом чист ва он то кай идома меёбад?

- Бо мақсади ошноӣ пайдо намудан ва омӯхтани таҷриба, самаранок гардонидани фаъолият дар самти интихоби касб, инчунин омодагии хатмкунандагон ба имтиҳонҳои марказонидаи дохилшавии Маркази миллии тестии назди Президенти Ҷумҳурии Тоҷикистон дар ҳамкорӣ бо Вазорати маориф ва илми Ҷумҳурии Тоҷикистон имтиҳонҳои озмоишии тарҳи маҷмӯи фанҳои имтиҳонии низоми имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбиро доир намуд. Ин иқдом бори нахуст буда, имкон медиҳад, ки хатмкунандагон барои дохил шудан, ба муассисаҳои таҳсилоти миёна ва олии касбӣ омодагии беҳтар дошта бошанд.

Дар ин давра аз тарафи шуъбаҳои маорифи шаҳру ноҳияҳои ҷумҳурӣ рӯйхати хатмкунандагони муассисаҳои таълимӣ бо интихоби гурӯҳи ихтисосҳо (кластерҳо), ки дар имтиҳонҳои озмоишӣ иштирок менамоянд, пешниҳод гардид. Дар умум аз 63 шаҳру ноҳияҳои ҷумҳурӣ рӯйхати 13 122 нафар хатмкунандагон пешниҳод гардид. Рӯйхатҳо тибқи интихоб ба гурӯҳи ихтисосҳо ҷудо карда шуд, ки дар умум 999 синфхонаҳои имтиҳониро ташкил дод.

Дар давоми моҳҳои октябр-декабри соли ҷорӣ аз тарафи кормандон ва мутахассисони марказ дар ҳамкорӣ бо раёсату шуъбаҳои маориф дар 63 шаҳру ноҳияҳои ҷумҳурӣ имтиҳонҳои озмоишӣ гузаронида шуд.

Таҳлилҳо нишон медиҳад, ки давомоти иштирокдорон дар имтиҳонҳои озмоишӣ 82,75 фоизро ташкил дод.

- Хатмкунандагон аз чанд муассисаи таълимӣ ба ин имтиҳонҳо ҷалб карда шуданд ва иштирокчиён аз натиҷаи имтиҳонҳо чӣ гуна огаҳ шуданд?

- Дар маҷмӯъ ба имтиҳонҳои озмоишӣ аз 530 муассисаи таълимӣ хатмкунандагон ҷалб гардиданд. Баъд аз анҷоми имтиҳонҳо аз тарафи кормандон ва мутахассисони Маркази миллии тестӣ варақаҳои ҷавобҳои иштирокчиён санҷида шуда, натиҷаҳо тавассути раёсату шуъбаҳои маориф ба муассисаҳои таълимӣ ирсол карда шуд.
Дар ҳамкорӣ бо муассисаҳои таълимӣ дар як қисми онҳо бо иштироки кормандон ва мутахассисони марказ ва намояндагони раёсату шуъбаҳои маориф ҷаласаи падару модарон ташкил карда шуда, натиҷаи имтиҳонҳои озмоишӣ баррасӣ гардид.

- Ба андешаи шумо омодагии хонандагон ба имтиҳонҳои марказонидашудаи дохилшавӣ дар кадом сатҳ аст?

- Натиҷаҳои имтиҳонҳои озмоишӣ нишон медиҳад, ки бо вуҷуди омодагиҳои зиёд сатҳи дониши иштирокчиён аз фанҳои дақиқ сусттар аст ва дар ин маврид ба падару модарон ва омӯзгорон тавсия дода шуд, ки бо хатмкунандагон дар доираи фанҳои имтиҳонӣ омодагии хуб бинанд.

Бояд тазаккур дод, ки баъд аз анҷоми имтиҳонҳо иштирокчиён бо худ китобчаҳои тестро, ки дар он саволу масъалаҳои тест оварда шудааст, гирифта ба хона мебаранд. Иштирокдорони имтиҳонҳои озмоиширо зарур аст, ки бо истифода аз китобчаҳои тест бо ҳамроҳии падару модар, омӯзгорон ва ҳамсинфон машғулиятҳои иловагӣ гузаронанд, то ин ки сатҳи дониши худро баланд бардоранд ва тавонанд дар имтиҳоноти асосӣ, ки моҳи июли соли 2022 баргузор мегардад, иштирок намуда, соҳиби унвони донишҷӯ гарданд.

- Нафароне, ки бо сабабҳои гуногун натавонистанд, аз ин имтиҳонҳои озмоишӣ гузаранд, барояшон имкони дубора вуҷуд дорад?

- Нафароне, ки бо сабабҳои гуногун дар имтиҳонҳои озмоишӣ иштирок накарданд ё муассисаҳои таълимии онҳо ба имтиҳонҳои озмоишӣ ҷалб карда нашуданд, набояд рӯҳафтода шаванд. Онҳо метавонанд, аз сомонаи расмии марказ (www.ntc.tj) истифода карда, бо хизматрасонии “Худро бисанҷ” шинос шаванд ва аз он истифода баранд. Ин хизматрасонӣ ҳам ба монанди имтиҳонҳои озмоишӣ мебошад ва бартарияш дар он аст, ки баъд аз анҷоми имтиҳон, ки тариқи тест дар компютер супорида мешавад, истифодабаранда ҳамон замон аз натиҷаи имтиҳон огаҳӣ пайдо менамояд.

Бояд хотиррасон кард, ки дар ҳамкорӣ бо Раёсати маорифи шаҳри Душанбе Маркази миллии тестӣ дар заминаи Маркази таҳлилӣ-иттилоотии назди Раёсати маорифи шаҳри Душанбе барномаи хизматрасонии “Худро бисанҷ”-ро дар 100 адад компютер ҷо ба ҷо кардааст ва соли дуюм аст, ки ба пуррагӣ хатм-кунандагони шаҳри Душанбе имтиҳонҳои озмоиширо бо истифода аз хизматрасонии “Худро бисанҷ” мегузаронанд.

- Ташкили чунин имтиҳонҳои озмоишӣ то кадом андоза метавонад ба сатҳи огоҳии хатм-кунандагон доир ба қоидаву тартиботи ҷараёни имтиҳонот, тағйиру иловаҳо дар раванди баргузории онҳо, шаффофият ва паҳлуҳои дигари баргузории имтиҳоноти дохилшавӣ мусоидат намояд?

- Мақсад аз гузаронидани озмоиши мазкур пеш аз ҳама шиносоии хатмкунандагон бо тарҳи маҷмӯи фанҳои имтиҳонӣ, дарк кардан ва пайдо намудани масъулият дар вақти супоридани имтиҳонҳои воқеӣ ва шинос шудан ба таркиби саволу масъалаҳои тест вобаста ба фанҳои имтиҳонист. Марказ тасмим гирифтааст, ки аз таътилҳои зимистона ва баҳорӣ самаранок истифода бурда, дар қисми зиёди муассисаҳои таълимӣ имтиҳонҳои озмоишӣ ташкилу баргузор намояд.