Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон тасмим дорад, ки шаҳодатномакунонии малакаҳои касбиро роҳандозӣ намояд.

Дар ин бора имрӯз - 30 июл Фарҳод Раҳимӣ, раиси Кумитаи мазкур зимни нишасти хабарии ниҳодаш хабар дод.

Ӯ зикр намуд, ки ҳадаф аз ба роҳмонии ин фаъолият он аст, нафаре, ки аз нозукиҳои ҳунар ва ё пешае огоҳ аст, вале ягон ҳуҷҷати расмии тасдиқкунанда надорад, давоми се рӯз ва ё як ҳафта ба омӯзиши назариявӣ ҷалб гардидаву пас аз он дар назди комисияи корӣ имтиҳон месупорад ва дар сурати исбот кардани малакаҳои худ соҳиби ҳуҷҷати мазкур мегардад.

 - Вай метавонад, ки бо доштани ҳуҷҷати намунаи давлатӣ фаъолияти худро дар дилхоҳ корхона идома диҳад, чӣ давлатӣ ва ё ғайридавлатӣ бошад,-гуфт Фарҳод Раҳимӣ.

Гулафшон КАРИМОВА, “ҶТ”