Давоми соли 2021 дар 800 муассисаи таълимии кишвар санҷишҳо гузаронида шуда, дар натиҷаи маълум гардид, ки донишазхудкунӣ нисбат ба соли гузашта 3,7 % ва сифати таҳсилот 2,7 % баланд гардидааст.

Ин нуктаро Шоҳин Саидзода, директори Агентии назорат дар соҳаи маориф ва илми назди Президенти Ҷумҳурии Тоҷикистон имрӯз зимни нишасти матбуотӣ ироа кард.

Ӯ дар бораи боз ҳам баланд бардоштани сатҳу сифати таҳсилот, омода кардани кадерҳои баландихтисос ҳарф зада, ҳамзамон зикр гардид, ки агентӣ тасмим гирифтааст, ки дар соли 2022 индикатор ва меъёрҳои муайянкунандаи сифати таҳсилот ва сатҳи донишазхудкуниро дар мувофиқа ва ҳамкорӣ бо Вазорати маориф ва илми Ҷумҳурии Тоҷикистон таҷдиди назар карда, баҳогузорӣ ба сифат ва аз худнамоии барномаҳои таълимиро ба раванди ислоҳот ва стандартҳои фаннӣ ва касбӣ мутобиқ намояд.