Соли 2022 дар шаҳру навоҳии кишвар шумораи муассисаҳое, ки дар ҳолати садамавӣ қарор доранд, ба 258 адад расидааст. Дар ин бора Раҳим Саидзода, вазири маориф ва илми Ҷумҳурии Тоҷикистон 2 феврал зимни нишасти хабарӣ иттилоъ дод.

Дар идомаи масъалаи мазкур гуфта шуд, муассисаҳое, ки дар ҳолати садамавӣ қарор доранд, шумораи онҳо дар соли 2021, 345 адад буд. Ин шумора дар соли 2022 аллакай 258 адад шуд, яъне 87 муассиса аллакай таъмир шуданд ва аз ҳолати садамавӣ бароварда шуданд. Муассисаҳое, ки таъмирталабанд, дар соли 2021, 452 адад буд, вале имсол ба 362 адад омада расиданд, яъне 90 муассиса таъмир шудаанд.

Ҳамзамон, гуфта шуд, ки дар соли гузашта 199 муассиса азнавсозӣ, таъмир ва бо 44 ҳазору 851 ҷойи нишаст мавриди истифода қарор гирифт.

“Ба ҳолати имрӯза мо ягон муассиса дар вагонхона надорем. 352 муассисаҳое ҳастанд, ки дар ҳолати садамавӣ қарор доранд. Дар маҷмуъ, соли 2022 аз ҳисоби маблағҳои мутамарказҳои асосии ба Вазорати маориф ва илм ҷудогардида, ба андозаи 30 млн. сомонӣ корҳои сохтмонӣ ва муҷаҳҳазгардонӣ ба анҷом расонида шудааст, ки нисбат ба нақшаи солона 100% -ро ташкил медиҳад”, - гуфт вазири маориф ва илми кишвар.