Ректори Донишкадаи идоракунии давлатии назди Президенти Ҷумҳурии Тоҷикистон Абдухалил Ғафурзода рӯзи 11 феврали соли 2019 зимни нишасти матбуотии ин муассиса аз фаъолияти яксолаи он ба хабарнигорон иттилоъ дод.

Аз ҷумла аз фаъолияти донишкада дар самти муносибатҳои байналмилалӣ ректор чунин гуфт, ки донишкада ба мақсади ба роҳ мондани ҳамкориҳои илмӣ, таълимӣ ва методӣ бо донишгоҳҳои хориҷӣ ҳамкориҳоро ба роҳ мондааст, ки ин ҳамкориҳо тайёр намудани мутахассисони соҳибкасб, баланд бардоштани савияи илму дониши устодону донишҷӯён, омӯхтани таҷрибаи пешқадам барои беҳтар намудани сифати таълим тавассути технологияи ҳозиразамон, ташкил ва фиристодани устодон ба хориҷи кишвар ҷиҳати ширкат дар ҷаласаҳо, конфронсҳои илмию байналмилалӣ ва табодули таҷрибаи якдигарро дар бар мегиранд:

- Донишкада бо 12 муассисаҳои таълимию илмии хориҷи кишвар ва ташкилотҳои байналмилалӣ шартномаҳои ҳамкорӣ дорад, - иброз дошт ректори донишкада. – Дар доираи ҳамкориҳо бо Донишгоҳи давлатии Уқёнуси Ороми шаҳри Хабаровск, Донишгоҳи давлатии иқтисодии шаҳри Самараи Федератсияи Русия, Донишгоҳи давлатии Астрахан оид бо донишҷӯён музокирот ба роҳ монда шудааст ва ҷиҳати амалигардонии ин ҳадаф дар соли таҳсили 2019-2020 раёсати донишкада чораҳои амалиро роҳандозӣ намуда истодааст.

Ҳамчунин зикр гардид, ки дар асоси шартномаи ҳамкориҳои дуҷонибаи донишкада ва Бунёди Ҳаннс Зайдел барои баланд бардоштани савияи дониш, маҳорати кордониву корбарӣ дар самти суханварӣ ва идоракунии хизматчиёни давлатӣ, ҳамзамон табодули таҷрибаи хизматчиёни давлатӣ, аз 12 то 17 ноябри соли 2018 барои 15 нафар хатмкардагони магистратураи донишкада аз тарафи тренери олмонӣ Карстен Мертенс семинар – машварат дар мавзуи “Самаранок гузаронидани гуфтушунидҳои мураккаб” гузаронида шуд.