Дар ноҳияи Ванҷ бо ибтикори Шуъбаи маориф ва Бахши кор бо ҷавонон ва варзиши ноҳия даври мактабии озмуни ҷумҳуриявии “Фурӯғи субҳи доноӣ...” оғоз гашт, ки дар он зиёда 100 нафар хонанда аз 25 муассисаи таълимии ноҳия ширкат доранд.

Ба гуфтаи масъулини бахш озмун рӯзи душанбе, ҳафтаи ояндаи соли равон ҷамъбаст мегардад ва ғолибон ба даври ноҳиявӣ роҳхат мегиранд. Инчунин, ғолибонро туҳфаи шуъбаи маорифи ноҳия интизор аст.

Мавриди зикр аст, ки озмун ба мақсади баланд бардоштани завқи китобхонӣ, тақвияти ҳофизаи фарҳангӣ, дарёфти чеҳраҳои нави суханвару сухандон, арҷ гузоштан ба арзишҳои миллию фарҳангӣ, инкишофи қобилияти эҷодӣ, таҳкими эҳсоси худогоҳию худшиносӣ, бой гардонидани захираи луғавӣ, тақвияти ҷаҳони маънавӣ ва фаъолигардонии доираи забондонӣ миёни қишрҳои мухталифи ҷомеа, аз ҷумла хонандагону донишҷӯёни ҳамаи зинаҳои таҳсилот ва шаҳрвандони кишвар доир мешавад.