Вазорати маориф ва илми Ҷумҳурии Тоҷикистон гуфт, ки дарси донишҷӯён ва хонандагони мактабҳо рӯзи 17-уми август оғоз меёбад.

Маҳмадюсуф Имомзода, вазири маориф ва илми кишвар 17-уми июл зимни нишасти хабарӣ бо рӯзноманигорон дар шарҳи оғоз гардидани дарс дар мамлакат гуфт, таҳсил дар донишгоҳҳо ва мактабҳои Тоҷикистон аз рӯи тартиб 1-уми сентябр оғоз мешавад. Аммо ба хотири он ки донишҷӯён ва хонандагон барвақттар ба таътили ғайринавбатӣ рафта, аз идома таҳсил дур шуданд, ду ҳафтаи аввал ба дарсхонӣ мутобиқ мешаванд.

“Ду ҳафта пеш ба интихоб шудани ҳамин чиз сабаб он аст, ки ҳам мактаббача, донишҷӯ ва ҳам омӯзгорони муассисаҳои таҳсилотӣ каму беш аз ҷараён дур шудем ва ҳамин ду ҳафтае, ки мо муқаррар кардем, ҳафтаи мутобиқшавӣ аст. Чунин тасмим ба он хотир аст, то шогирдон ва омӯзгорони мо тавонанд, бори дигар мутобиқ шаванд, дарсҳои нагузаштаро такрор кунанд ва ба 1-уми сентябр омодагии ҷиддӣ бинанд”, - гуфт дар идома вазири маориф ва илм.

Ёдовар мешавем, ки аз 27-уми апрели соли равон бо мақсади пешгирӣ аз паҳншавии бемории COVID-19 хонандагони мактабҳои кишвар то моҳи август ба таътил фиристода шудаанд. Тибқи иттилоъ соли ҷорӣ макотиби Тоҷикистонро 162 ҳазор хонандаи синфи 9 ва беш аз 123 ҳазор хонандаи синфи 11 хатм кардааст.